अपघातात तरुण उद्योजकाचा मृत्यू

अपघातात तरुण उद्योजकाचा मृत्यू
छावणीतील घटना : डिव्हायडरवर आदळली कार
नागपूर :
छावणीस्थित पूनम चेंबर्सजवळ रस्ता दुभाजकाला (डिव्हायडर) धडकून शहरातील उद्योजक आणि नेते अशोक गोयल यांच्या मुलाचा मृत्यू झाला.
अभिषेक गोयल (३२) असे मृत तरुण उद्योजकाचे नाव आहे. अभिषेक वडिलांसोबत मिळून डाळ मिल सांभाळत होता. तो रविवारी रात्री १२ वाजताच्या सुमारास स्वीफ्ट कारने (एमएच ३१/ईए२६२३) छावणी येथील पूनम चेंबर्ससमोरून जात होता. पागलखान्याच्या दिशेने जात असताना त्याचे कारवरील नियत्रंण अचानक सुटले आणि त्याची कार रस्ता दुभाजकावर चढली. यात अभिषेक जखमी झाला. रस्त्याने जात असलेल्या काही नागरिकांनी त्याला खासगी रुग्णालयात दाखल केले. परंतु तोपर्यंत उशीर झाला होता. रुग्णालयात पोहोचताच डॉक्टरांनी त्याला मृत घोषित केले.
अभिषेकची ओळख पटलेली नव्हती. सदर पोलिसांना घटनेची माहिती मिळाल्यावर त्यांनी गोयल कुटुंबाला याबाबत माहिती दिली. अभिषेक हा अशोक गोयल यांचा सर्वात लहान मुलगा होता. अशोक गोयल यांना अभिषेकसह मोठा मुलगा आशिष आणि अनिमेष ही मुले आहेत. या घटनेपासून अभिषेकची पत्नी निशा हिला प्रचंड मानसिक धक्का बसला आहे. अभिषेकला चार वर्षांची मुलगी श्रीया आणि दोन वर्षांचा मुलगा रिधान आहे. या घटनेमुळे पूर्व नागपुरातील उद्योजकांमध्ये शोक पसरला आहे.
अपघातात अभिषेकला आंतरिक मार बसल्याचा संशय आहे. सदर पोलिसांनी अपघाताचा गुन्हा दाखल केला आहे.