लोकमत न्यूज नेटवर्कनवी दिल्ली : लोकसभा निवडणुकीत कोणालाच स्पष्ट बहुमत न मिळाल्यास भाजपला सत्तेबाहेर ठेवण्यासाठी विरोधी पक्षांनी एकत्र येऊन सरकार स्थापनेची रणनीती आखण्याच्या दृष्टीने तेलुगू देसमचे नेते व आंध्र प्रदेशचे मुख्यमंत्री एन. चंद्राबाबू नायडू यांनी रविवारी लागोपाठ दुसऱ्या दिवशी समविचारी पक्षनेत्यांच्या भेटीगाठी सुरूच ठेवल्या.
शुक्रवारी दिल्लीत आलेल्या चंद्राबाबूंनी शनिवारनंतर पुन्हा रविवारी काँग्रेस अध्यक्ष राहुल गांधी व राष्ट्रवादी काँग्रेसचे अध्यक्ष शरद पवार यांची भेट घेणे लक्षणीय होते. दोन्ही बाजूंकडून भेटीचा तपशील दिला गेला नसला तरी विरोधकांच्या आघाडीत उघडपणे येण्याची भूमिका अद्याप तरी न घेतलेल्या सपा व बसपाच्या नेत्यांना लखनौमध्ये भेटून आल्यानंतर चंद्राबाबूंनी गांधी व पवार यांना पुन्हा भेटावे हे महत्त्वाचे मानले जात आहे.
याच अनुषंगाने नायडू रविवारी रात्री ‘संपुआ’च्या अध्यक्ष सोनिया गांधी यांनाही भेटणे अपेक्षित होते.भाजपला सत्तेबाहेर ठेवण्यासाठी प्रसंगी पंतप्रधानपदाचा आग्रह न धरण्याचे संकेत काँग्रेसकडून दिले गेल्यानंतर विरोधकांची एकत्र मोट बांधण्याच्या हालचालींना वेग आला आहे. शनिवारी दिल्लीत राहुल गांधी व शरद पवार यांच्याखेरीज नायडू भारतीय कम्युनिस्ट पक्षाचे सुधाकर रेड्डी व डी. राजा यांनाही भेटले होते. त्यानंतर त्यांनी लखनौ येथे जाऊन सपाचे नेते अखिलेश यादव व बसपाच्या प्रमुख मायावती यांच्याशीही चर्चा केली होती.याआधी नायडू यांनी गेल्या आठवड्यात तृणमूल काँग्रेसच्या प्रमुख व प. बंगालच्या मुख्यमंत्री ममता बॅनर्जी आणि दिल्लीचे मुख्यमंत्री व आम आदमी पार्टीचे प्रमुख अरविंद केजरीवाल यांच्याशीही चर्चा केली होती. तेलंगणाचे मुख्यमंत्री व तेलंगणा राष्ट्र समितीचे प्रमुख के. चंद्रशेखर राव याच दिशेने स्वतंत्रपणे प्रयत्न करीत आहेत. त्यांनाही सोबत घेण्यास आपल्याला वावडे नाही, असे नायडू यांचे म्हणणे आहे.