मुलीची हत्या करुन वडिलांनी प्रियकराच्या दरवाजात फेकला मृतदेह

गुलसबाच्या आईला शेजारच्या खोलीतून तिचा आवाज ऐकू आला. गुलसबा बरोबर घरात कोणीतरी पुरुष असल्याचे तिला समजले.

 ऑनलाइन लोकमत 

लखनऊ, दि. 23 - मुलीला समजावूनही मुलगी प्रेमसंबंध तोडत नसल्याने संतापलेल्या पित्याने पोटच्या मुलीची गळा चिरुन हत्या केली आणि मृतदेह प्रियकराच्या दरवाजात नेऊन फेकला. उत्तरप्रदेशच्या मुझफ्फरनगर जिल्ह्यातील चारथावाल गावात बुधवारी भरदिवसा ही घटना घडली. 

 

पोलिसांनी आरोपी पिता जब्बार कुरेशीला अटक केली आहे. गुलसबाचे दिलनवाज अहमद या मुलाबरोबर प्रेमसंबंध होते. या नात्याला जब्बार यांचा विरोध होता. बुधवारी सकाळी गुलसबाच्या आईला शेजारच्या खोलीतून तिचा आवाज ऐकू आला. गुलसबा बरोबर घरात कोणीतरी पुरुष असल्याचे तिला समजले. तिने दरवाजाला कडी लावली आणि नवरा जब्बारला याची माहिती दिली. 

 

तोपर्यंत दिलनवाजला घरात कोंडून ठेवल्याचे शेजा-यांना समजले. त्यांनी तात्काळ पोलिसांना याची माहिती. पोलिसांनी तिथे येऊन दिलनवाजची सुटका केली. जब्बारचा रस्त्यावर कपडे विकण्याचा व्यवसाय आहे. सकाळी आठच्या सुमारास जब्बार रागाच्या भरात  घरी आला.  त्याने कुठलाही विचार न करता गुलसबाची गळा चिरुन हत्या केली आणि तिचा मृतदेह दिलनवाजच्या दरवाजात नेऊन फेकला. त्यानंतर जब्बारने स्वत:च पोलिस स्टेशनमध्ये जाऊन गुन्ह्याची कबुली दिली. पोलिसांनी लगेच जब्बारला अटक केली.