ऑनलाइन लोकमत
पाटणा, दि. ९ - बिहारमध्ये १ एप्रिलपासून दारूबंदी लागू करण्यात आली असून या बंदीचे उल्लंघन करणा-या एका व्यक्तीला जोरदार फटका बसला आहे. ट्रेनमध्ये मित्रासह दारू प्यायल्यामुळे एका व्यक्तीला स्वत:च्याच लग्नाच्या एक दिवस आधी तुरूंगात जावे लागल्याची घटना बिहारमध्ये घडली.
मनदीप सिंग असे त्या तरूणाचे नाव असून तो मूळचा पंजाब येथील आहे. गुरूवारी रात्री मनदीप स्वत:च्या लग्नासाठी मित्रासह पश्चिम बंगालमधील असनसोल येथे जात होता. दुस-या दिवशीच लग्न असल्यामुळे भलताच खुश असलेला मनदीप मित्रासह हावड्याला जाणा-या पंजाब मेलच्या एसी कोचमध्ये बसून दारू पीत होता.
मात्र त्यांची गाडी बिहारच्या दानापूर येथे पोहोचताच इतर प्रवाशांनी नोंदवलेल्या तक्रारीमुळे रेल्वे पोलिसांनी ट्रेनमध्ये चढून मनदीपला त्याच्या मित्रासह दारू पिण्याच्या आरोपाखाली अटक करत त्या दोघांची रवानगी तुरूंगात केली.
त्यामुळे स्व:तचे शानदार लग्न व रिसेप्शनची स्वप्न पाहणा-या मनदीपला तुरूंगावारी भोगावी लागली.