ऑनलाइन लोकमत
लखनौ, दि. ४ - भारतीय जनता पार्टीच्या सदस्य मोहिमेला मुस्लीमांकडूनही चांगला प्रतिसाद मिळाल्याचे दिसत असून एकूण मिळून सुमारे ३० लाख मुस्लीमांनी भाजपाचे सदस्यत्व स्वीकारल्याचे पक्षाच्या प्रवक्त्यांनी सांगितले आहे. विशेष म्हणजे भाजपा सत्तेत असलेल्या वा भाजपाचा चांगला प्रभाव असलेल्या राज्यांमधून या मोहिमेला चांगला प्रतिसाद मिळाला आहे. मिस कॉल द्या आणि भाजपाचे सदस्य व्हा या मोहिमेला सर्व स्तरावरील लोकांनी प्रतिसाद दिला असून मुस्लीमही मागे नसल्याचे भाजपा नेत्यांचे म्हणणे आहे.
भाजपाच्या मायनॉरिटी सेलचे प्रमुख अब्दुल रशीद अन्सारी यांच्या सांगण्यानुसार याआधी भाजपाचे सदस्य असलेल्या मुस्लीमांची गणना केली गेली नव्हती परंतु आता मात्र ती दुपटीने वाढल्याचे दिसत आहे. नव्या सदस्य मोहिमेमध्ये मध्य प्रदेशातल्या ४ लाख मुस्लीमांनी, गुजरातमधल्या २.६ लाख, दिल्लीतल्या २.५ लाख, पश्चिम बंगालमधल्या २.३ लाख तर उत्तर प्रदेशातील १.७५ लाख मुस्लीमांनी भाजपाचे सदस्यत्व घेतल्याचे दिसून आले आहे.
भाजपाची सध्याची एकूण सदस्य संख्या १० कोटी असून त्यापैकी ३० लाख म्हणजे ३ टक्के सदस्य मुस्लीम आहेत. ही संख्या १० टक्क्यापर्यंत वाढवण्याचा पक्षाचा मानस आहे. पक्षाचे सदस्य झाल्यानंतर त्यांना कार्यकर्ते बनवण्याचा प्रयत्न ही पुढली पायरी असून ती आव्हानात्मक असल्याचे अन्सारी यांनी मान्य केले. बूथ लेव्हलच्या चार ते पाच कार्यकर्त्यांमध्ये किमान एक मुस्लीम असावा असे धोरण आखण्यात येत असून त्यामुळे मुस्लीम सदस्य कार्यकर्ते म्हणून पक्षात विलीन होतील अशी योजना आहे. जर अल्पसंख्याकांना बरोबर घेण्याची ही योजना यसस्वी ठरली तर उत्तर प्रदेश, बिहार व पश्चिम बंगाल इथे होणा-या निवडणुकांमध्ये भाजपाला चांगलाच फायदा होईल असा अंदाजही राजकीय तज्ज्ञांनी व्यक्त केला आहे.