२०... गुन्हे

भानेगाव येथे तरुणाची आत्महत्या
खापरखेडा : तरुणाने घरी गळफास लावून आत्महत्या केल्याची घटना खापरखेडा पोलीस ठाण्याच्या हद्दीतील भानेगाव येथे गुरुवारी सकाळी ६.३० वाजताच्या सुमारास घडली. भानेगाव येथे सलग दुसऱ्या दिवशीही आत्महत्येचा प्रकार घडल्याने खळबळ उडाली.
बजरंग मोहन परसमोडे (२२, रा. भानेगाव, ता. सावनेर) असे मृत तरुणाचे नाव आहे. बजरंग हा गुरुवारी सकाळी त्याच्या खोलीत छताला लटकलेल्या अवस्थेत त्याच्या वडिलांना आढळून आला. सदर प्रकाराची माहिती मिळताच खापरखेडा पोलीस घटनास्थळी पोहोचले. त्यांनी पंचनामा करून मृतदेह उत्तरीय तपासणीसाठी पाठविला. बजरंगला दोन मोठे भाऊ असून, दोघेही वेगळे राहायचे. बजरंग अविवाहित असल्याने तो वडिलांसोबत राहायचा. त्याला मागील काही दिवसांपासून रोजगार नसल्याने चिंतेत राहात असल्याची माहिती त्याच्या निकटवर्तीयांनी दिली. शिवाय, त्याला दारूचे व्यसनही जडले होते. या प्रकरणी खापरखेडा पोलिसांनी अकस्मात मृत्यूची नोंद केली असून, सदर घटनेचा तपास सहायक पोलीस निरीक्षक भागोजी चोरमुले, गणेश पाल, आशिष मुगले करीत आहे. (प्रतिनिधी)
***
वाटमारी करणाऱ्यास अटक
कळमेश्वर : महिलेचा पाठलाग करून तिच्या पर्समधील रोख रक्कम पळविण्याचा प्रयत्न करणाऱ्या कळमेश्वर पोलिसांनी अटक केली. ही कारवाई गुरुवारी दुपारी ३.३० वाजताच्या सुमारास करण्यात आली.
वीरेंद्र रामदास बोकडे (३२, रा. थपडीपवनी) असे अटक करण्यात आलेल्या आरोपीचे नाव आहे. फिर्यादी दामिनी सुरेश हरवडे (२६, रा. फेटरी) या त्यांची पुतणी शिल्पा बेलकर हिच्यासोबत कळमेश्वरातील बाजारातून बसस्थानकाकडे पायी येत होत्या. दरम्यान, आरोपी वीरेंद्रने त्यांचा पाठलाग करीत त्यांच्या पर्समधील एक हजार रुपये काढून पळ काढला. हरवडे यांनी लगेच पोलीस ठाण्यात तक्रार दाखल केली. त्यामुळे पोलिसांनी आरोपीचा शोध घेत त्याला ताब्यात घेतले. या प्रकरणी कळमेश्वर पोलिसांनी भादंवि ३९२ अन्वये गुन्हा नोंदवून आरोपीस अटक केली.
***