शिवनई येथील विद्यापीठ उपकेंद्राचे बांधकाम लवकर सुरू करण्याबाबत उदय सामंत यांनी शुक्रवारी (दि.२२) नाशिक दौऱ्यात चर्चा केली. नाशिक जिल्ह्यातील वेगळ्या अभ्यासक्रमांमध्ये शिक्षण घेणाऱ्या विद्यार्थ्यांना सध्या कार्यरत असणाऱ्या उपकेंद्रास अनेक मर्यादा आहेत. त्यामुळे विद्यार्थ्यांना विद्यापीठासंदर्भात येणाऱ्या त्रुटींच्या पूर्ततेसाठी नाशिक ते पुणे असा प्रवास अनेकवेळा करावा लागतो. यामुळे वेळ आणि पैसा या दोन्ही गोष्टींचा अपव्यय होतो. या अगोदरदेखील शिवनई येथील उपकेंद्र कार्यान्वित करण्याबाबत अनेक आंदोलने झाली आहेत. यामुळे ते लवकर सुरू व्हावे, अशी सरकारची भूमिका आहे. त्यामुळेच विद्यापीठाने अर्थसंकल्पात दोन कोटींच्या निधीची तरतूदही केली आहे. परंतु, तांत्रिक अडचणींमुळे अद्याप उपकेंद्राचे काम प्रत्यक्षात सुरू होऊ शकलेले नाही. या सर्व तांत्रिक अडचणींचा निपटारा उदय सामंत यांनी यावेळी केला. ग्रामस्थांच्य मागणीनुसार एका बाजूने १५ फुटाचा रस्ता सोडण्यात आला असून या जागेतील अतिक्रमण आणि सुरत-चेन्नई महामार्गाची जागा सोडून उपक्रेंद्राच्या इमारतीचे काम सुरू करण्याचे निर्देश सामंत यांनी विद्यापीठ प्रशासनाला केले आहे. या ठिकाणी सध्या उपकेंद्रासाठी १० हजार चौरस फुटाचे बांधकाम करण्यात येणार असून, संरक्षक भिंतीचेही बांधकाम करण्यात येणार आहे. त्यासाठी १० ते २० फेब्रुवारीदरम्यान मास्टर प्लॅन तयार करण्याच्या सूचना केल्या. त्यासाठी विद्यापीठ प्रशासनाला शासनाच्या मान्यतेचे पत्र हस्तांतरित करतानाच उपकेंद्राचे काम तत्काळ सुरू करण्याच्या सूचना केल्या आहेत. त्यामुळे लवकरच नाशिककरांसाठी शिवनई येथे विद्यापीठाचे उपकेंद्र आकार घेईल, अशी आशा नाशिकच्या शैक्षणिक वर्तुळात निर्माण झाली आहे. यावेळी खासदार हेमंत गोडसे, विदयापीठाचे कुलसचिव डॉ. प्रफुल्ल पवार, उपकुल सचिव एम. रासवे, उपकेंद्र समन्वयक डॉ. प्रशांत टोपे, कार्यकारी अभियंता आर. व्ही. पाटील, सिनेट सदस्य अमित पाटील, डॉ. नंदू पवार, साईनाथ दुर्गे आदी उपस्थित होते.
(आरफोटो- २२ उदय सामंत१) विद्यापीठ उपकेंद्राच्या जागेची पाहणी करताना उच्च व तंत्रशिक्षण मंत्री उदय सामंत. समवेत हेमंत गोजसे, डॉ. प्रफुल्ल पवार, एम. रासवे, डॉ. प्रशांत टोपे, आर. व्ही. पाटील, अमित पाटील, डॉ. नंदू पवार, साईनाथ दुर्गे आदी.