माणसांच्या चेहऱ्यांची माणसे गेली कुठे...

गझलसंध्या : भीमराव पांचाळे यांची अर्थगर्भी मैफल

नाशिक : ‘माणसांची अचानक माकडे झाली कशी?, माणसांच्या चेहऱ्यांची माणसे गेली कुठे?’, ‘जळणाऱ्याला विस्तव कळतो, बघणाऱ्याला नाही’...यांसारख्या एकाहून एक सरस अर्थगर्भी गझल सादर करत भीमराव पांचाळे यांनी नाशिककरांना मनसोक्त रिझविले आणि सोबत सुख-दु:खाच्या व्यवस्थापनाचा मंत्रही दिला.  गंगापूररोडवरील विश्वास लॉन्स याठिकाणी विश्वास बॅँकेचे अध्यक्ष विश्वास ठाकूर यांची संकल्पना आणि ग्रंथमित्र विनायक रानडे यांचे संयोजन या समन्वयातून विश्वास ग्रुपच्या वतीने नववर्षाच्या पूर्वसंध्येला गझलनवाज भीमराव पांचाळे यांच्या मैफलीचे आयोजन करण्यात आले होते. पांचाळे यांनी ‘अंदाज आरशाचा वाटे खरा असावा’ या गझलेने मैफलीची सुरुवात केली. आशयघन गझलांबरोबरच काही शेरही पांचाळे यांनी ऐकवत मैफलीत रंग भरले. ‘तोडाल वृक्ष जेव्हा, ध्यानात हे असूद्या, कित्येक पाखरांचा तो आसरा असावा’ या पर्यावरणावरील शेरबरोबरच ‘माझीच भाग्यरेखा परक्या घरात गेली’ या पंक्तीलाही उपस्थितांनी भरभरून दाद दिली. अमरावतीच्या नितीन देशमुख यांची ‘जळणाऱ्याला विस्तव कळतो, बघणाऱ्याला नाही, जगणाऱ्याला जीवन कळते, पळणाऱ्याला नाही’ या गझलेलाही रसिकांनी उत्स्फूर्त दाद दिली. ‘अश्रूंना जर पंख जरासे लावून घेता आले असते, या डोळ्यातून त्या डोळ्यांना झरकन येता आले असते’, ‘हे का कुणी फुलांना सांगायला हवे’, ‘जावो शिसेका बदन लेके किदर जावो’,‘मज नको गगन’ ‘जीवनाला दान घ्यावे लागते’, ‘हा असा चंद्र अशी रात’, आणि ‘गरिबाच्या लग्नाला नवरी’ या एकापेक्षा एक सरस गझलांनी मैफल सजत व सुगंधित होत गेली. पांचाळे यांना संगीतसाथ गिरीश पाठक (तबला), जगदीश मोरली (हार्मोनियम), अब्रार अहमद (संतूर), इक्बाल वारसी (व्हायोलिन) यांनी केली. मैफलीचे निवेदन दत्ता बाळसराफ यांनी केले. (प्रतिनिधी)