वन्यजीवांच्या जखमांचा ‘दाह’ केव्हा थांबणार?

नाशिक : शहरासह जिल्ह्यात विविध अपघातांमध्ये जखमी होणाऱ्या वन्यजीवांच्या जखमांचा ‘दाह’ केव्हा थांबणार? असा प्रश्न नाशिककर वन्यजीवप्रेमींकडून उपस्थित केला जात आहे. शहरासह जिल्ह्यात बिबटे, कोल्हे, तरस, माकड, वानर, मोर यांसारखे वन्यजीव विविध कारणास्तव जखमी होतात, अशा वेळी वनविभागाकडून वन्यजीवप्रेमींच्या मदतीने त्यांना रेस्क्यूही केले जाते; मात्र शहरात त्यांच्यावर उपचार व सुश्रुषा करण्यासाठी हक्काची स्वतंत्र जागाच उपलब्ध नसल्याने जखमींची ससेहोलपट होत आहे.

नाशकात ट्रान्सिट ट्रिटमेंट सेंटर सुरू व्हावे, अशी मागणी वन्यजीवप्रेमींकडून मागील अनेक वर्षांपासून केली जात आहे. वनविभागाकडून याबाबत वारंवार प्रस्ताव तयार करून ते मंजुरीसाठी नागपूर कार्यालयाकडे पाठविले जातात; मात्र यावर अद्याप शिक्कामोर्तब होऊ शकलेले नाही. नुकतेच नाशिक पश्चिम वनविभागाने या उपचार केंद्राचा नव्याने प्रस्ताव तयार करत आराखडा जिल्हा नियोजन विकास समितीच्यापुढे ठेवण्यात आला आहे; मात्र या प्रस्तावाबाबत अद्याप कुठलाही निर्णय होऊ शकलेला नाही. एकूणच वन्यजीवांच्या जखमांच्या वेदनांवर फुंकर घालण्यासाठी आवश्यक असणारे ट्रान्सिट ट्रिटमेंट सेंटरला कधी मुहूर्त मिळेल याकडे नाशिककरांचे लक्ष लागून आहे.

वनविभागाच्या म्हसरुळ येथील वनउपज आगारामधील एक हेक्टर जागेवर वन्यप्राणी, सरपटणारे प्राणी, पक्षी यांच्यावर औषधोपचार करण्याकरिता अद्ययावत सर्व सोयीसुविधांनी सुसज्ज असे सेंटर उभारणी करण्यात येणार आहे. यासाठी आराखडा नाशिक वनपरिक्षेत्राचे वनक्षेत्रपाल विवेक भदाणे यांनी जिल्हाधिकारी कार्यालयाकडे सादर केला आहे. यासाठी अंदाजे पाच कोटी रुपयांचा निधी प्रस्तावित असून ‘डीपीडीसी’कडून निधीला मिळालेल्या मंजुरीनंतर वन्यजीवांच्या जखमांचा दाह शमणार आहे.

---इन्फो---

कोल्ह्याला हलविणार पुण्याला

शनिवारी रात्री नाशिक-त्र्यंबक रस्ता ओलांडण्याच्या प्रयत्नात असलेल्या एका दीड ते दोन वर्षांच्या कोल्ह्याला एका भरधाव अज्ञात वाहनाने धडक दिली. या धडकेत कोल्हा जखमी झाला. सुदैवाने या अपघातात कोल्ह्याचे प्राण वाचले; मात्र हाडे फॅक्चर झाल्यामुळे पुढील उपचारांसाठी कोल्ह्याला पुण्याला ‘रेस्क्यू’ चॅरिटेबल ट्रस्टच्या उपचार केंद्रात हलवावे लागणार आहे. यापूर्वीही अशाच प्रकारे एक कोल्हा गंभीर जखमी झाला होता. त्यालाही पुण्यात उपचारार्थ हलवावे लागले होते. सुदैवाने त्याचे प्राण वाचले. नाशिकला उपचाराचे अद्ययावत केंद्र अस्तित्वात नसल्यामुळे वन्यप्राण्यांना थेट पुण्याला हलविण्याशिवाय दुसरा कोणताही मार्ग वनविभागापुढे सध्या तरी नाही.

---

२१पीएचएफबी७६ जखमी कोल्हा

===Photopath===

210221\21nsk_20_21022021_13.jpg

===Caption===

अपघातात जखमी कोल्हा