चोरट्यांची परिसरातून ‘वरात’

नाशिक : भाडेतत्त्वावर दुचाकी घेत सोनसाखळी हिसकावून पोबारा करणाऱ्या पेठरोडवरील अश्वमेधनगरातील सोनसाखळी चोरट्यांच्या मुसक्या आवळण्यात पोलिसांना यश आले आहे.

 लोकमत न्यूज नेटवर्कनाशिक : भाडेतत्त्वावर दुचाकी घेत सोनसाखळी हिसकावून पोबारा करणाऱ्या पेठरोडवरील अश्वमेधनगरातील सोनसाखळी चोरट्यांच्या मुसक्या आवळण्यात पोलिसांना यश आले आहे. पोलिसांनी या ‘श्रीमंत’ चोरट्यांची परिसरातून रविवारी (दि.१४) ‘वरात’ काढली.पादचारी महिलांच्या गळ्यातील सौभाग्याचं लेणं हिसकावून आपले ‘भाग्य’ उजळविण्याचा प्रयत्न करणारा सराईत गुन्हेगार किरण छगन सोनवणे (वय २२, रा. अश्वमेधनगर) याचा पंचवटी पोलिसांनी जेव्हा माग काढला तेव्हा त्याची तीन मजली आलिशान इमारत बघून पोलीसही चक्रावले. जेव्हा साध्या वेशातील पोलिसांनी जेव्हा त्याच्या इमारतीच्या तळमजल्यावरील उंबरा ओलांडला आणि घरात प्रवेश करून त्याला ताब्यात घेतले तेव्हा घरात असलेल्या चैनीच्या महागड्या ब्रॅण्डेड वस्तू बघून पोलीस अवाक् झाले. घरात कोणीही कमावते नसल्याने आलिशान इमारतीच्या या ‘श्रीमंत’ सराईत गुन्हेगाराला पोलिसांनी जेरबंद करून गुन्ह्यात खांद्याला खांदा लावून मदत करणारा त्याचा साथीदार विलास राजू मिरजकरच्या (वय २७, रा.लक्ष्मणनगर) मुसक्या आवळल्या. या दोघांचीही पोलिसांनी ‘वरात’ काढून परिसरातील रहिवाशांसमोर पितळ उघडे पाडले. या दोघांना जिल्हा सत्र न्यायालयाने येत्या मंगळवारपर्यंत पोलीस कोठडी सुनावली आहे. सोनवणे हा सराईत गुन्हेगार असून, त्याच्यावर जबरी चोरी, घरफोडी, सोनसाखळी चोरीचे गंभीर गुन्हे म्हसरूळ, पंचवटी, येवला पोलीस ठाण्यात दाखल आहेत. त्याच्याकडून अजून गुन्हे उघडकीस येण्याची शक्यता पोलिसांनी वर्तविली आहे. पोलिसांनी सोनवणे याच्या राहत्या घरातून सुमित्रा बच्छाव यांची चोरलेली सोनसाखळी हस्तगत केली आहे.