लोहोणेर : गेल्या दोन दिवसांपासून झालेल्या वादळी वारा आणि पावसामुळे मातीच्या घराची भिंत कोसळून पाच वर्षीय चिमुकल्याचा मृत्यू झाला तर दोन जण गंभीररित्या जखमी झाल्याची दुर्दैवी घटना देवळा तालुक्यातील सावकी येथील आदिवासी वस्तीत घडली आहे. देवळा तालुक्यातील सावकी येथील सोनवणे कुटुंबीय गाढ झोपेत असताना शुक्रवारी पहाटेच्या सुमारास ही घटना घडली आहे. गंभीर जखमी झालेल्या दोघांना उपचारासाठी नाशिक जिल्हा रुग्णालयात दाखल करण्यात आले आहे.
देवळा तालुक्यातील सावकी येथील आदिवासी वस्तीत राहणाऱ्या पठाण कचरू सोनवणे यांचे मातीचे घर आहे. काल गुरुवारी झालेल्या वादळी वारा आणि पावसामुळे मातीच्या भितींत पाणी मुरल्याने सदर घराची भिंत रात्री साडेबारा वाजताच्या सुमारास अचानक कोसळली. घरामध्ये गाढ झोपेत असलेले पठाण सोनवणे त्यांची पत्नी सुनीता सोनवणे यांचा पाच वर्षीय मुलगा आकाश सोनवणे व सात वर्षीय मुलगा कुणाल सोनवणे यांच्या अंगावर ती भिंत कोसळली. घर कोसळल्याचा आवाज ऐकून शेजारी व आजूबाजूचे ग्रामस्थ धावत आले व ढिगाऱ्याखाली दबलेल्या सर्वांना त्यांनी घराबाहेर काढले. यामध्ये तिघांना गंभीर इजा झाल्याने रुग्णालयात उपचारासाठी घेऊन जात असताना पाच वर्षीय आकाश या चिमुकल्याचा रस्त्यात मृत्यू झाला तर सुनीता पठाण सोनवणे (२७) व कुणाल पठाण सोनवणे (७) हे दोघे गंभीर जखमी झाले असून त्यांच्यावर नाशिक जिल्हा रुग्णालयात उपचार सुरू आहेत पठाण सोनवणे (२९) याला किरकोळ दुखापत झाली आहे.
--------------
घटनास्थळाची पाहणी
घटनास्थळी देवळा तहसीलदार दत्तात्रेय शेजुळ, गटविकास अधिकारी राजेश देशमुख यांनी भेट देऊन प्रत्यक्ष पाहणी केली व सोनवणे कुटुंबीयांचे सांत्वन केले. सावकी येथील तलाठी कल्याणी कोळी व ग्रामसेवक वैशाली पवार यांनी सदर घटनेचा पंचनामा केला असून शासनाने दुर्घटनाग्रस्त सोनवणे कुटुंबीयांना तातडीने आर्थिक मदत करावी, अशी मागणी सावकी ग्रामस्थांनी केली आहे.
-----------------
(१६ आकाश सोनवणे), सावकी येथे सोनवणे यांच्या घराची कोसळलेली भिंत. (१६ लोहोणेर १)
160721\16nsk_9_16072021_13.jpg
१६ लोहोणेर १/१६ आकाश सोनवणे