तालुक्यात आजपर्यंत १७२ बाधितांचा कोरोनाने बळी गेला आहे. तालुक्यातील कोरोनाबाधितांची एकूण संख्या ४२६१ झाली असून यापैकी ३६८८ बाधित कोरोनामुक्त झाले आहेत. तर सद्य:स्थितीत अॅक्टिव्ह (बाधित) रुग्णसंख्या ४०१ इतकी आहे.
तालुक्यातील ६ प्राथमिक आरोग्य केंद्रांसह नगरसूल ग्रामीण रुग्णालय, शहरातील उपजिल्हा रुग्णालयात कोरोना लसीकरण केले जाते. आतापर्यंत २० हजार १२० लोकांचे लसीकरण झाले आहे. हे प्रमाण अवघे दहा टक्के इतके आहे. मात्र, सद्य:स्थितीत लस उपलब्ध नसल्याने गेल्या तीन दिवसांपासून लसीकरण ठप्प झालेले आहे. शहरासह तालुक्यातील ४५ वर्षांपुढील ९५ हजार ९१७ तर १८ ते ४४ वयोगटातील १ लाख ३३ हजार १४० असे एकूण २ लाख २९ हजार ५७ लोकांना लसीकरण करण्याचे आरोग्य विभागाचे उद्दिष्ट आहे.
आरोग्य विभागाने शहरात वाॅर्ड क्रमांक १ ते ४ मध्ये कोरोना चाचणी मोहीम सुरू केली असून शहरातील सर्वच वाॅर्डांत ही मोहीम राबविण्यात येणार आहे.