नाशिक : महात्मानगर परिसरातील लक्ष्मी प्रोव्हिजनसमोरून मित्रासोबत जाणाऱ्या यश विलास दुधे (१५) या मुलाचा मोबाइल दुचाकीवरून आलेल्या दोघांपैकी मागे बसलेल्या एकाने हिसकावून नेत त्यांच्या मागे असलेल्या दुचाकीवरील दोघांनी त्यांना मदत केल्याची घटना घडली. दरम्यान, पोलिसांनी याचील तीन आरोपींना अटक केली असून एकाचा पोलीस शोध घेत आहेत.
पोलिसांनी दिलेल्या माहितीवरून, यश दुधे व त्याचा मित्र रस्त्याने पायी जात असताना मागून आलेल्या मोपेड दुचाकीवरील पाठीमागे बसलेल्या एका मुलाने यशच्या हातातील मोबाइल हिसकावून नेला. तसेच त्यांच्या मागे अललेल्या दुचाकी एमएच १५ एफबी २७२९ वरील दोघांनी त्यांना मदत केली. याप्रकरणी यश दुधे याने गंगापूर पोलीस ठाण्यात फिर्याद दिल्यानंतर पोलिसांनी या प्रकरणात समावेश असलेल्या चौघा चोरट्यांचा शोध घेत त्यातील आकाश केदारनाथ राखुंडे (२२, रा. माहेश्वरी भवन, आर्टीलरी सेंटर रोड, नाशिक रोड) , राहुल विनोद खराटे (२२, रा. खोले मळा) व रोहित संदीप भामरे (१९, रा. नारायण बापूनगर ) तिघांना अटक केली आहे. तर चौथा अरोपी विकास पूर्ण नाव पत्ता माहीत नाही याचा पोलीस शोध घेत आहेत.