-----
माणिकनगरमधून टेम्पो लांबविला
नाशिक : शहरात मोटारसायकल चोरीच्या घटना सुरू असतानाच आता टेम्पोसारखी मालवाहू वाहनेदेखील चोरीचे प्रकार सुरू झाले आहेत. माणिकनगर परिसरातून एक आयशर टेम्पो चोरीला गेल्याप्रकरणी रूपेश आनंदा वालझाडे (रा. गंगावेश, सिन्नर) यांनी अंबड पोलीस ठाण्यात फिर्याद दिली आहे. २३ जानेवारी २०२१ रोजी रूपेश याने त्याचा आयशर टेम्पो क्र. (एमएच ०४ एफजे ९९९२) मोरे मळा, माणिकनगर येथे उभा केला होता. या वेळी अज्ञात चोरट्याने हा टेम्पो चोरून नेल्याचे फिर्यादीत म्हटले आहे.
----
घरफोडीत दागिने, रोकड लंपास
नाशिक : बंद घराचे कुलूप तोडून चोरट्यांनी घरात प्रवेश करत रोख रक्कम व सोन्याच्या दागिन्यांवर डल्ला मारल्याची घटना चुंचाळे शिवारातील संजीवनगरमध्ये घडली. या प्रकरणी आनंदा महादू नवले (रा. संजीवनगर, चुंचाळे शिवार) यांनी दिलेल्या फिर्यादीवरून अंबड पोलीस ठाण्यात गुन्हा दाखल करण्यात आला आहे. गुरुवारी (दि. ११) नवले यांच्या घरी कोणी नसताना अज्ञात चोरट्याने त्यांच्या बंद घराचे कुलूप तोडून घरात प्रवेश केला व खोलीतील लोखंडी कपाटात ठेवलेली १० हजार रुपयांची रोख रक्कम, १७ ग्रॅम वजनाचा सोन्याचा नेकलेस व १ ग्रॅमची सोन्याची नथ असा १ लाख ६८ हजारांचा ऐवज लुटून नेला आहे.
----------