या ग्रीन फिल्ड मार्गात सुरत ते चेन्नई हे १,६०० किलोमीटरचे अंतर अवघे १,२५० किलोमीटर वर येणार असून, हा महामार्ग नाशिक जिल्ह्यातील काही तालुक्यांमधून जाणार असल्याने नाशिक – सुरत दरम्यानचे अंतर अवघे १७६ किलोमीटरवर येणार आहे. सदर महामार्गासाठी जमिनी अधिग्रहणाबाबत नुकतीच भारतीय राष्ट्रीय राजमार्ग प्राधिकरणाची बैठक होऊन जमिनी हस्तांतरणाला सुरुवात करण्याचा निर्णय घेण्यात आला. ग्रीनफिल्ड अंतर्गत सुरत-नाशिक-अहमदनगर-करमाळा-सोलापूर-कर्नल-कडप्पा-चेन्नई असा तयार करण्यात येणार आहे. यामुळे दोन मुख्य शहरांना जोडणाऱ्या या मार्गातील अंतर ३५० किलोमीटरने कमी होणार असून सहा पदरीकरणामुळे वेळेची देखील बचत होणार आहे. दरम्यान, हा महामार्ग नाशिक जिल्ह्यातून १७६ किलोमीटर अंतर कापणार आहे. या अंतर्गत सुरगाणा-पेठ-दिंडोरी-नाशिक-निफाड-सिन्नर या सहा तालुक्यातून जाणार आहे. जवळपास १२२ किलोमीटर व ६९ गावांमधून हा महामार्ग जाणार आहे. लवकरच प्रत्यक्ष महामार्ग अस्तित्वात येणार असल्याची माहिती खासदार हेमंत गोडसे यांनी दिली. भारतीय राष्ट्रीय राजमार्ग प्राधिकरणाच्या बैठकीस उपमहाप्रबंधक एम.एस. कुमार, आर. के. पांडे, महाबीर सिंग, मनोज कुमार, श्रीमान अलोक, एस. एस. सांधू आदी पदाधिकारी उपस्थित होते.
चौकट===
सुरत – चेनई : १,२५० किलोमीटर, वेळ : १० तास
नाशिक –सुरत : १७६ किलोमीटर, वेळ : २ तास
नाशिक ते चेन्नई : ८ तास