लासलगाव/विंचूर : येथून जवळच असलेल्या विष्णूनगर फाट्यावर ट्रॅक्टरला पाठीमागून ट्रकने धडक दिल्याने अपघात होऊन ट्रॅक्टर ट्रॉलीसह उलटला. यात ट्रॅक्टर चालक जखमी झाला.
नाशिक औरंगाबाद महामार्गाने शिंदेवाडी, ता. सिन्नर येथील शरद घोटेकर गुरुवारी सकाळी ६.४५ वाजेदरम्यान विंचूर उपबाजार समितीकडे कांद्याने भरलेला ट्रॅक्टर (क्र. एमएच १५ एचएम ३८५३) कांदे विक्रीसाठी घेऊन जात असताना विष्णूनगर फाट्याजवळ ट्रक (एमएच १८ बीजी ३२८१)ने पाठीमागून ट्रॅक्टरला धडक दिली. यामध्ये ट्रॅक्टरसह कांद्याने भरलेली ट्रॉली महामार्गावर उलटून ट्रॉलीतील कांदे रस्त्यावर पडले. त्यामुळे शेतकऱ्यांच्या कांद्याचे मोठ्या प्रमाणात नुकसान झाले. ट्रॅक्टर चालक जखमी झाला. सुदैवाने कुठलीही जीवितहानी झाली नाही. ट्रॅक्टर रस्त्यातच पलटी झाल्याने वाहतूक काही काळ बंद झाली होती; परंतु पोलिसांनी घटनास्थळी येऊन स्थानिक नागरिकांच्या मदतीने कांदे दुसऱ्या ट्रॅक्टरमध्ये भरून देत वाहतूक सुरळीत केली.
--------------------
विंचूरनजीक विष्णूनगरजवळ ट्रक व ट्रॅक्टर यांच्यात झालेला अपघातात रस्त्यावर पसरलेला कांदा.
(२६ विंचूर ॲक्सिडेंट)
260821\26nsk_1_26082021_13.jpg
२६ विंचूर ॲक्सीडेंट