पाेलीस सूत्रांनी दिलेल्या माहितीनुसार, सोनगाव येथील सोमनाथ सुकेणकर यांची मुलगी वैष्णवी हिचा विवाह गावातील नितीन कर्पे यांच्या सोबत ८ मार्च २०२० रोजी झाला. कर्पे कुटुंब नोकरीनिमित्ताने नाशिक येथे राहते. नितीन इंजिनियर असून तो पुणे येथे आयटी कंपनीत नोकरी करतो. लॉकडाऊन असल्यामुळे तो जवळपास अनेक दिवसांपासून नाशिक येथे कुटुंबासोबत राहत आहे.
वैष्णवी खेड्यातील आहे, तिला काम येत नाही, ती गावंढळ आहे, असे म्हणत पती नितीन, सासू, नणंदा, नणंदाचे पती हे वारंवार त्रास देत होते. त्रासाला कंटाळून काही महिन्यांपूर्वी वैष्णवी माहेरीदेखील आली होती. त्यावेळी गावातील प्रतिष्ठित नागरिक विजय कारे, सरपंच अंकुश गायकवाड यांनी पुढाकार घेऊन पुन्हा सासरच्या माणसांना समज देऊन वैष्णवीला सासरी पाठवले होते.
नणंद रोशना शिंदे व तिचे पती अभिजित शिंदे, दुसरी नणंद प्रिया कदम व तिचे पती महेश कदम हे घरी येऊन वारंवार वैष्णवीच्या तक्रारी तिचा पती नितीन यांच्याकडे करत असत. त्यांचे ऐकून नितीन तिला वारंवार मारहाण करत असे, सासरकडून पैसे आणायला सांगत असे, वैष्णवीचा शारीरिक, मानसिक छळ झाल्यामुळे ती मनाने खचली होती. त्यामुळे तिचा घातपात झाला असून तिची आत्महत्या केली असा बनाव कुटुंबाने रचला असल्याची फिर्याद तिच्या वडिलांनी दिली आहे. त्यावरून पोलिसांनी गुन्हा दाखल केला असून पुढील तपास पोलीस उपनिरीक्षक एस. बी. पवार करत आहेत.