शिवसेनेची मुसंडी, राष्ट्रवादीच्या जागा घटल्या

शिवसेनेची मुसंडी, राष्ट्रवादीच्या जागा घटल्या

 नाशिक : गेल्या दीड दशकापासून सत्तेवर असलेल्या राष्ट्रवादी कॉँग्रेसला अखेर गुरुवारच्या (दि.२३) निकालामुळे पायउतार व्हावे लागण्याची चिन्हे आहेत. सर्वांत मोठा पक्ष म्हणून शिवसेनेने मुसंडी मारत २५ जागांवर विजय मिळवित सत्तेकडे आगेकूच केली आहे, तर चार जागांवर थेट पंधरा जागांवर विजय मिळवित भाजपाने शिवसेनेला सत्तेत सोबत जाण्याकडे वाटचाल सुरू केली आहे.शिवसेनेचे सर्वात धक्कादायक निकाल मालेगाव, नाशिक व निफाडसाठी लागले. मालेगाव येथून सातपैकी अवघ्या दोन गटांतून झोडगे, वडनेर खाकुर्डी गटातून शिवसेनेला, तर निमगाव, कळवाडी, सौंदाणे, दाभाडी व रावळगाव गटातून भाजपाने विजय मिळवित मुसंडी मारली. निफाड तालुक्यातील दहा गटांपैकी पाच गटांवर राष्ट्रवादी कॉँग्रेसने विजय मिळविला. येथून आमदार अनिल कदम यांना हा धक्का मानला जात आहे. चांदोरी, देवगाव, पालखेड, सायखेडा, विंचूर गटात राष्ट्रवादी कॉँग्रेसने विजय मिळविला, तर उगाव, पिंपळगाव व कसबेसुकेणे गटावर शिवसेनेचा भगवा फडकला. सिन्नर तालुक्यातील सहापैकी पाच जागांवर शिवसेनेने मुसंडी मारत नगरपालिका निवडणुकीची परंपरा कायम राखली. देवपूर या एकमेव भाजपाचा गट वगळता चास, नायगाव, ठाणगाव, मुसळगाव व नांदुरशिंगोटे गटातून शिवसेनेचे उमेदवार निवडून आले आहेत. इगतपुरी तालुक्यातील पाचपैकी नांदगाव सदो, शिरसाटे, खेड गटातून शिवसेनेचे, तर घोटी व वाडीवऱ्हेतून राष्ट्रवादी व कॉँग्रेसचे उमेदवार निवडून आले. नाशिक तालुक्यात शिवसेनेचे जबरदस्त पिछेहाट होत पळसे, गोवर्धन, गिरणारे गट राष्ट्रवादीच्या ताब्यात तर पळसे गटातून सेनेचे बंडखोर शंकर धनवटे अपक्ष म्हणून निवडून आले. त्र्यंबकेश्वर तालुक्यातून अंजनेरीतून कॉँग्रेस, ठाणापाडातून माकपा, तर हरसूल गटातून राष्ट्रवादी पुरस्कृत अपक्ष उमेदवार निवडून आले. सुरगाणा तालुक्यातून भवाडा व गोेंदुणे गटातून माकपा, तर हट्टी गटातून भाजपाचे उमेदवार निवडून आले. कळवण तालुक्यातील कनाशी, मानूर व खर्डेदिघर गटातून राष्ट्रवादी तर अभोणा गटातून कॉँग्रेसने जागा जिंकली. दिंडोरी तालुक्यातील अहिवंतवाडी, कसबेवणी, मोहाडी, खेडगाव येथून शिवसेना, तर उमराळे व कोचरगाव गटातून कॉँग्रेसने विजय मिळविला. देवळा तालुक्यातून लोहणेर येथून भाजपा, तर उमराणे व वाखारी गटातून राष्ट्रवादीचे उमेदवार विजयी झाले. बागलाण तालुक्यातून नामपूर, वीरगाव, ठेंगोडा, ब्राह्मणगाव गटातून भाजपा, तर जायखेडा गटातून राष्ट्रवादी व ताहाराबाद गटातून अनुक्रमे राष्ट्रवादी व कॉँग्रेसने जागा जिंकली. पठावे दिघर गटातून अपक्ष आदिवासी क्रांतिसेनेने जागा जिंकली. (प्रतिनिधी)