लोकमत न्यूज नेटवर्कनाशिक : वाल्मीकनगर येथील जालिंदर ऊर्फ ज्वाल्या उगलमुगले या २६ वर्षीय युवकाचे अपहरण केल्याप्रकरणी पंचवटी पोलिसांनी मंगळवारी (दि. २४) दोघा संशयिताना अटक केली आहे. या प्रकरणात आणखी काही संशयित आरोपींची नावे मिळाली असल्याने संशयितांची संख्या वाढणार असल्याचे पोलिसांनी सांगितले. पावणेदोन वर्षांपूर्वी वाल्मीकनगर परिसरात राहणारा २६ वर्षीय उगलमुगले हा बेपत्ता झाल्याची तक्रार पोलीस ठाण्यात नोंदविण्यात आलेली होती. उगलमुगले हा बेपत्ता असल्याने त्याचे अपहरण झाले असावे, अशी शक्यता पोलीस सूत्रांनी व्यक्त केली होती. त्यानुसार पोलीस नाईक अशोक सरोदे यांनी दिलेल्या तक्रारीनुसार वाल्मीकनगर परिसरात राहणाऱ्या संशयित अविनाश कौलकर, रोहित कडाळे यांना अटक करण्यात आली आहे. संशयितांनी त्यांच्या अन्य काही साथीदारांच्या मदतीने उगलमुगले याचे अपहरण केल्याची माहिती पोलीस सूत्रांना मिळाल्याने त्यादृष्टीने पोलीस तपास सुरू असून, या अपहरण प्रकरणात आणखी काही संशयितांची नावे पुढे येण्याची शक्यता आहे. संशयितांनी उगलमुगले याचे अपहरण का केले याबाबत चौकशी सुरू असून, यात पूर्ववैमनस्यातील वादातूनच त्याचे अपहरण केल्याची कबुली ताब्यात घेतलेल्या संशयितांनी दिल्याचे पोलिसांनी सांगितले. सध्या तरी पोलिसांकडून बेपत्ता युवकाचा शोध घेतला जात असून, पोलीस तपासात पुढे जे काही स्पष्ट होईल व त्यात आणखी काही संशयितांची नावे आल्यास त्यांचाही शोध घेऊन त्यांनाही ताब्यात घेण्याची तयारी सुरू आहे.
संशयितांचा शोध सुरू
By admin | Updated: May 25, 2017 01:12 IST