अंगणवाडी सेविकांना वाढीशिवाय दिले मानधन

महापालिकेच्या ३५९ अंगणवाड्या असून, त्यात सहा मुख्य सेविका ३४२ सेविका आणि ३४० मदतनीस याप्रमाणे कर्मचारी आहेत. त्यात मुख्य सेविकांना ५ हजार ५०० रुपये, सेविकांना ४ हजार ६२०, तर मदतनीसांना ४ हजार ४०० रुपये इतके वेतन दिले जाते. २०१७मध्ये या कर्मचाऱ्यांना अंतिम वेतनवाढ देण्यात आली होती. त्यानंतर महापालिकेने मानधनवाढ दिली नव्हती. एरवीही महापालिकेच्या वतीने होणारे लसीकरण, घरभेटी, जनगणना, सर्वेक्षण अशी कामे या सेविकांकडून करून घेतली जातात. गेल्या वर्षी तर कोरोना संकट काळात या सेविकांनी जीव धोक्यात घालून काम केले. त्यातील अनेक महिलांना कोरोना संसर्गदेखील झाला हाेता. त्यामुळे या कर्मचाऱ्यांच्या मानधनात वाढ करावी, अशी मागणी करण्यात येत होती. त्याअनुंषगाने प्रशासनाने सर्वच सेविकांना एक हजार रुपयांची वेतनवाढ देण्याचा प्रस्ताव सादर केला हाेता. त्यानुसार अंदाजपत्रकात ३ कोटी ७३ लाख रुपयांची तरतूद करण्यात आली होती. मात्र, महासभेत दोन हजार रुपयांची वेतनवाढ देण्यात आली. त्यामुळे प्रशासनाची काहीशी अडचण झाली. अंदाजपत्रकातील तरतुदीत आणखी वाढ कशी करायची, असा प्रश्न असून त्यामुळे दोन महिन्यांपासून हा विषय रखडला आहे. मात्र, याच दरम्यान या सेविकांना जून महिन्यात सेवा खंडित केल्यानंतर पुन्हा दोन महिन्यांपासून वाढीव तर सोडाच, परंतु नियमित मानधनदेखील मिळाले नव्हते. यासंदर्भात लोकमतने वृत्त दिल्यानंतर प्रशासन हलले आणि किमान त्यांना नियमित वेतन तरी अदा करण्यात आले आहे.