नगर पथविक्रेता समितीची होणार पुनर्रचना

नाशिक :महापालिकेमार्फत नगर पथविक्रेता समितीची लवकरच पुनर्रचना करण्यात येणार असून, नवीन तरतुदीनुसार समितीवर विविध संघटनांच्या पाच सदस्यांची नियुक्तीप्रक्रिया सुरू करण्यात आली आहे.

नाशिक : राष्ट्रीय फेरीवाला धोरणांतर्गत महापालिकेमार्फत नगर पथविक्रेता समितीची लवकरच पुनर्रचना करण्यात येणार असून, नवीन तरतुदीनुसार समितीवर विविध संघटनांच्या पाच सदस्यांची नियुक्तीप्रक्रिया सुरू करण्यात आली आहे. महापालिकेने राष्ट्रीय फेरीवाला धोरणांतर्गत हॉकर्स झोनचा आराखडा तयार केला असून, सदर आराखडा आता अंमलबजावणीच्या अंतिम टप्प्यात आहे. महापालिकेचे तत्कालीन आयुक्तांनी यापूर्वी आपल्या अधिकारात शहर फेरीवाला समिती गठीत करत त्यावर विविध हॉकर्स संघटनांच्या पदाधिकाऱ्यांना प्रतिनिधित्व दिले होते. आता सदर समितीचा कार्यकाल संपुष्टात आला असून, नवीन तरतुदीनुसार, नगर पथविक्रेता समिती स्थापन करण्यासाठी नोंदणीकृत हॉकर्सचे मतदान घेऊन समितीवर सदस्य निवडप्रक्रिया राबविली जाणार आहे. त्यापूर्वी, महापालिकेमार्फत सदर समितीवर अशासकीय संघटना, समुदाय आधारित संघटना, निवासी कल्याण संघ, व्यापारी संघ आणि पणन संघ यांचा प्रत्येकी एक सदस्य नामनिर्देशित केला जाणार आहे. त्यासाठी मनपाने संबंधित संघ - संघटनांकडून पात्र व्यक्तीचे नामनिर्देशन मागविले आहे. त्यासाठी ८ एप्रिल २०१७ ही अंतिम मुदत देण्यात आली आहे. सदर व्यक्तींची नामनिर्देशनपत्रे प्राप्त झाल्यानंतर ती मान्यतेसाठी शासनाकडे पाठविली जाणार आहेत. या संघ-संघटनांवरील व्यक्तींना नामनिर्देशनासाठी काही अटीही महापालिकेने घातल्या असून, निकषात बसणाऱ्यांचीच समितीवर नियुक्ती केली जाणार आहे. (प्रतिनिधी)पथविक्रेत्यांची नोंदणी महापालिकेने यापूर्वी हॉकर्स झोनचा आराखडा तयार करताना सुमारे साडेनऊ हजार फेरीवाल्यांची बायोमेट्रिक नोंदणी करून घेतली होती. मात्र, ज्या विक्रेत्यांची नोंदणी अजूनही शिल्लक आहे, त्यांनाही नोंदणीसाठी आवाहन करण्यात आले आहे. सदर विक्रेत्यांची नोंदणी करून घेतली जाणार असून, त्यानंतर एकत्रित मतदार यादी तयार करून ती कामगार आयुक्तालयाकडे पाठविली जाणार आहे. सदर मतदारांमार्फत पथविक्रेता समितीवर आठ सदस्यांसाठी निवडणूक घेतली जाणार असल्याची माहिती सूत्रांनी दिली.