लोकमत न्यूज नेटवर्क
पुणे : भाईचंद हिराचंद रायसोनी (बीएचआर) या पतसंस्थेत अवसायक जितेंद्र कंडारे व त्याच्या साथीदारांनी केलेल्या गैरव्यवहाराचे पुणे पोलिसांच्या आर्थिक गुन्हे शाखेने तब्बल एक ट्रक भरून पुरावे गोळा केले आहेत. त्यात प्रामुख्याने जळगावमधील वेगवेगळ्या १२ ठिकाणी टाकलेल्या छाप्यात मिळालेली कागदपत्रे, शपथपत्रे, तसेच लॅपटॉप, पीसीओसह मोठ्या प्रमाणावर डिजिटल साहित्यही हस्तगत करण्यात आले आहे. याबरोबरच औरंगाबाद व अन्य ठिकाणी केलेल्या तपासणीत अनेक महत्त्वपूर्ण कागदपत्रे पोलिसांच्या हाती लागली आहेत.
‘बीएचआर’संबंधित कारवाईसाठी पुणे पोलिसांनी संपूर्ण गुप्तता पाळली होती. याप्रकरणी डेक्कन, पिंपरी आणि पुणे ग्रामीण पोलिसांकडे ३ गुन्हे दाखल आहेत. दोन पोलीस उपायुक्त, ४ सहायक पोलीस आयुक्त, २५ पोलीस निरीक्षक, २५ सहायक निरीक्षक आणि १०० पोलीस कर्मचारी असा पुणे, पिंपरी आणि ग्रामीण पोलिसांच्या या मोठ्या पथकाने जळगावमध्ये जाऊन गेल्या शुक्रवारी सकाळीच छापे घातले होते. त्यात जळगावमधील १२ ठिकाणी एकाचवेळी हे छापे घालण्यात आले. त्यातून मिळालेल्या माहितीवरून इतर ठिकाणी तसेच औरंगाबाद येथे झडत्या घेण्यात आला.
सुमारे एक ट्रक भरून मिळालेल्या या कागदपत्रांची छाननी सध्या सुरू आहे. त्यामध्ये ठेवीदारांच्या पावत्या, कर्जदारांचे शपथपत्रे, अनेक बनावट शिक्के असे साहित्य आहे. त्यातील कोणते बँकेने केलेली दस्तऐवज आहेत व कोणते आरोपींनी बेकायदेशीरपणे लोकांकडून करून घेतलेली कागदपत्रे आहेत, ही कागदपत्रे लिलावामधील आहेत की तारण म्हणून घेतलेली आहेत, याची तपासणी सुरू करण्यात आली आहे. त्यासाठी पुणे पोलिसांनी स्वतंत्र पथक तयार केले आहे. तसेच अटक केलेल्या आरोपीचे जबाब नोंदवून घेण्याचे कारण स्वतंत्र पथक करीत आहेत.
चौकट
ठेवीदारांकडून पुणे पोलिसांचे स्वागत
पुणे पोलिसांच्या कारवाईचे बीएचआरचे ठेवीदार, गुंतवणूकदार, ग्राहक यांच्याकडून जोरदार स्वागत केले जात आहे. गेल्या दोन वर्षांपासून आम्ही न्यायासाठी प्रयत्न करीत आहोत. पोलिसांच्या कारवाईने आम्हाला न्याय मिळण्याची आशा वाटू लागल्याचे ठेवीदार म्हणू लागले आहेत. ‘बीएचआर’शी संबंधित अनेकजण आर्थिक गुन्हे शाखेत येऊन पोलिसांच्या या कारवाईचे स्वागत करीत आहेत.