---
घरफोडीत ५० हजारांची रोकड लंपास
नाशिक : भरदिवसा झालेल्या घरफोडीत चोरट्यांनी ५० हजारांच्या रोकडवर डल्ला मारल्याची घटना अशोक मार्ग परिसरात घडली. कुटुंबीय बाहेरगावी गेल्याची संधी साधत चोरट्यांनी ही घरफोडी केली. याप्रकरणी मुंबई नाका पोलीस ठाण्यात गुन्हा दाखल करण्यात आला आहे.
अब्बास यासीन कादरी (रा.अमिन टॉवर) यांनी याप्रकरणी पोलिसांकडे तक्रार दाखल केली आहे. कादरी कुटुंबीय रविवारी (दि.२८) सकाळी संगमनेरला गेले होते. त्यामुळे त्यांचे बंद घराचा कडीकोयंडा तोडून चोरट्यांनी घरात प्रवेश करत बेडरूममधील कपाटातून ५० हजाराची रोकड चोरून नेल्याचे फिर्यादीत म्हटले आहे.
---
दोन दुचाकी पळविल्या
नाशिक : शहरात मोटरसायकल चोरीची मालिका सुरूच असून चोरट्यांनी दोन दुचाकी चोरून नेल्या. याप्रकरणी नाशिकरोड आणि अंबड पोलीस ठाण्यात गुन्हा दाखल करण्यात आला आहे. जेलरोड भागातील अनिल लीलाचंद भावसार (रा. प्रथमेश अपा. त्रिवेणी पार्क) यांची अॅक्टिव्हा (एमएच १५ ईएम ३४७७) शुक्रवारी (दि.२६) रात्री त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी नाशिकरोड पोलीस ठाण्यात गुन्हा दाखल करण्यात आला. दुसरी घटना सिडकोत घडली. पंडित नगर भागात राहमारे मंगेश मधुकर शिंदे यांची होंडा शाईन (एमएच १५ जीएस ७७४८) दुचाकी रात्रीच्या वेळी त्यांच्या घरासमोरून चोरट्यांनी पळवून नेली. याप्रकरणी अंबड पोलीस ठाण्यात गुन्हा दाखल करण्यात आला आहे.
---
संत कबिरनगरला महिलेची आत्महत्या
नाशिक : संत कबिरनगर येथे राहणाऱ्या एका २४ वर्षी महिलेने गळफास लावून घेत आत्महत्या केली. या महिलेच्या आत्महत्येमागील कारण समजू शकले नसल्याचे पोलिसांनी सांगितले. याप्रकरणी गंगापूर पोलीस ठाण्यात मृत्यूची नोंद करण्यात आली आहे.
मोहिनी उमेश लहांगे (रा.भोसला स्कूल समोर) असे मयत महिलेचे नाव आहे. लहांगे या महिलेने सोमवारी (दि.१) सायंकाळच्या सुमारास अज्ञात कारणातून आपल्या राहत्या घरात लोखंडी गजाला ओढणी बांधून गळफास लावून घेतला होता. विजय भगरे यांनी दिलेल्या खबरीवरून गंगापूर पोलिसात मृत्यूची नोंद करण्यात आली आहे.