नॅब महाराष्ट्रच्या ब्रेल लायब्ररी

नॅब महाराष्ट्र-अ‍ॅम्वे अ‍ॅपॉर्च्युनिटी फाउंडेशन ब्रेल लायब्ररीचे सातपूरच्या नॅब संकुल येथे मंगळवारी (दि.१४) सकाळी दिमाखात उद्घाटन झाले.

नाशिक : नॅब महाराष्ट्र-अ‍ॅम्वे अ‍ॅपॉर्च्युनिटी फाउंडेशन ब्रेल लायब्ररीचे सातपूरच्या नॅब संकुल येथे मंगळवारी (दि.१४) सकाळी दिमाखात उद्घाटन झाले. याप्रसंगी प्रमुख अतिथी म्हणून अ‍ॅम्वेचे क्षेत्रीय व्यवस्थापक जिग्नेश मेहता, कल्याणी पवार, दिलीप निकम, नॅबचे अध्यक्ष रामेश्वर कलंत्री, महासचिव गोपी मयूर, मुक्तेश्वर मुनशेट्टीवार आदि मान्यवर उपस्थित होते. ब्रेल लिपीतील शैक्षणिक पुस्तके, फिक्शन, सेल्फ-हेल्प, जनरल नॉलेज आदि प्रकारांतील २०० पुस्तके आणि नियतकालिक यांची ब्रेल आवृत्तीतील पुस्तके व ६०० हून अधिक प्रकारची आॅडिओ सीडी प्रकारातली पुस्तके या लायब्ररीत उपलब्ध करून देण्यात आली आहे. यावेळी जिग्नेश मेहता यांनी मनोगत व्यक्त करताना सांगितले की, अंध व्यक्तींच्या कल्याणासाठी आम्ही अथक प्रयत्न करत आहोत. शिक्षण आणि ज्ञान हे शारीरिक मर्यादांच्या पलीकडे जाऊन संधी निर्माण करण्यासाठी उज्ज्वल भविष्याची चावी आहे. ब्रेल लायब्ररी यासाठीच्या उपक्रमात महत्त्वाचा भाग आहे. नॅशनल असोसिएशन फॉर द ब्लाइन्डच्या राज्यातील संस्थांसाठी अशा प्रकारच्या ३१ लायब्ररी तयार करण्याचा निर्धार केला असल्याचेही मेहता यांनी यावेळी स्पष्ट केले. महानॅब शाळेतील विद्यार्थिनींच्या स्वागतगीताने कार्यक्रमास प्रारंभ झाला. प्रतिमा पूजनानंतर लायब्ररीतील ब्रेल पुस्तकांचे विद्यार्थ्यांनी प्रातिनिधिक स्वरूपात वाचन केले. मान्यवरांच्या हस्ते फीत कापून ब्रेल लायब्ररीचे औपचारिक उद्घाटन करण्यात आले. एका पुस्तकाची आॅडिओ क्लिप ऐकून त्याचेही प्रातिनिधिक स्वरूपात उद्घाटन करण्यात आले. निवेदक श्याम पाडेकर यांनी सूत्रसंचालन केले. याप्रसंगी नॅब, अ‍ॅम्वेचे पदाधिकारी, शिक्षक, पालक, विद्यार्थी व नागरिक मोठ्या संख्येने उपस्थित होते.