नाशिक : ज्येष्ठ साहित्यिक आणि कुसुमाग्रज प्रतिष्ठानचे माजी अध्यक्ष मधु मंगेश कर्णिक यांना यंदाचा प्रतिष्ठेचा जनस्थान जाहीर करण्यात आला आहे. कुसुमाग्रज प्रतिष्ठानच्या वतीने दर दोन वर्षांनी दिला जाणारा हा सन्मान दि. १० मार्च २०२१ रोजी प्रदान करण्यात येणार असल्याचे निवड समितीचे अध्यक्ष ॲड. विलास लोणारी यांनी सांगितले.
कुसुमाग्रज स्मारकात झालेल्या पत्रकार परिषदेत ही घोषणा करण्यात आली. या प्रतिष्ठेच्या सन्मानाचे स्वरूप १ लाख रुपये, मानपत्र आणि स्मृतिचिन्ह असे आहे. दरवर्षी हा सन्मान कुसुमाग्रजांच्या जयंतीला अर्थात २७ फेब्रुवारीला प्रदान केला जातो. मात्र, यंदा प्रथमच हा सन्मान १० मार्चला स्मृतीदिनी प्रदान केला जाणार असल्याचे ॲड.लोणारी यांनी सांगितले. कविश्रेष्ठ कुसुमाग्रजांचे स्नेही पद्मश्री सन्मानप्राप्त मधु मंगेश कर्णिक हे कथाकार, कादंबरीकार, कवी, संवादलेखक म्हणून संपूर्ण महाराष्ट्राला सुपरिचित आहेत. ज्येष्ठ कवी केशवसुत यांचे कोकणातील मालगुंड येथे स्मारक उभारणीत मधु मंगेश कर्णिक यांचे मोठे योगदान आहे. गोवा शासनाच्या प्रसिद्धीखात्यात माहिती अधिकारी, मुंबईला राज्य शासनाचे जनसंपर्क अधिकारी, तसेच काहीकाळ महाराष्ट्राच्या मुख्यमंत्र्यांचे प्रसिद्धी अधिकारी म्हणूनही त्यांनी कामकाज केले. १९९० रत्नागिरीत झालेल्या ६४व्या अखिल भारतीय मराठी साहित्य संमेलनाच्या अध्यक्षपदाचा मानही त्यांना मिळाला असून, ग. दि. माडगूळकर प्रतिष्ठानच्या गदिमा पुरस्कारानेही त्यांना २०१० मध्ये गौरविण्यात आले आहे, तसेच २०१४ ते २०१९ या काळात कुसुमाग्रज प्रतिष्ठानचे अध्यक्ष म्हणून त्यांनी काम पाहिले होते. अनेक कथासंग्रहासह करूळचा मुलगा हे त्यांचे आत्मचरित्रही प्रसिद्ध आहे. घोषणेप्रसंगी कार्यवाह मकरंद हिंगणे, विश्वस्त आर्कि. संजय पाटील, अरविंद ओढेकर, गुरुमीत बग्गा, ॲड.अजय निकम, प्रा.हर्षवर्धन कडेपूरकर आदी उपस्थित होते. निवड समितीत विजय कुवळेकर, नीलिमा गुंडी, बाळकृष्ण कवठेकर, संतोष शेणई, प्रफुल्ल शिलेदार, मुकुंद संगोराम, शेखर गोडबोले, डॉ.विलास खोले, नीरजा यांचा समावेश होता.
इन्फो
माजी अध्यक्षांना प्रथमच ‘जनस्थान’
कुसुमाग्रज प्रतिष्ठानचे माजी अध्यक्ष असलेल्या कर्णिक यांना यंदाचा जनस्थान जाहीर झाल्याने, प्रथमच प्रतिष्ठानच्या एका माजी अध्यक्षास हा सन्मान दिला जाणार आहे. यापूर्वी जनस्थान विजय तेंडुलकर (१९९१), विंदा करंदीकर (१९९३), श्रीमती इंदिरा संत (१९९५), गंगाधर गाडगीळ (१९९७), व्यंकटेश माडगूळकर (१९९९), श्री. ना. पेंडसे (२०११), मंगेश पाडगावकर (२००३), नारायण सुर्वे (२००५), बाबूराव बागुल (२००७), ना. धों. महानोर (२००९), महेश एलकुंचवार (२०११), भालचंद्र नेमाडे ( २०१३), अरुण साधू (२०१५), विजया राजाध्यक्ष (२०१७), वसंत आबाजी डहाके (२०१९) यांना प्रदान करण्यात आला आहे.
इन्फो
गोदावरी गौरव २७ फेब्रुवारीला
कुसुमाग्रज प्रतिष्ठानतर्फे दर दोन वर्षांनी होणारा गोदावरी गौरव पुरस्कार सोहळा कोरोनाच्या पार्श्वभूमीवर गतवर्षी पुढे ढकलण्यात आला होता. ते पुरस्कार यंदा २७ फेब्रुवारीला प्रदान करण्यात येणार आहेत. त्यात डॉ.माधव गाडगीळ (विज्ञान), भगवान रामपुरे (शिल्प), श्रीगौरी सावंत (लोकसेवा), दर्शना जव्हेरी (नृत्य), सई परांजपे (चित्रपट), काका पवार (क्रीडा) यांचा सन्मान केला जाणार आहे.