नगरसेवकांच्या पळवापळवीला जोर

नगरसेवकांच्या पळवापळवीला जोर

नाशिक : महापौरपदाच्या निवडणुकीसाठी नगरसेवक पळवापळवीला जोर आला आहे. त्यामुळे सर्वच पक्ष सावध भूमिका घेत आहेत. मनसेच्या नगरसेवकांची राज ठाकरे यांनी हजेरी घेतली खरी; परंतु दोन नगरसेवक गैरहजरच होते. महापौर मनसेचाच होणार त्यामुळे इकडे-तिकडे जाऊ नका, असे राज यांनी बजावल्यानंतर सहल अहमदाबाद येथे रवाना झाली. दुसरीकडे मनसेसह अन्य पक्षांनी अन्य नगरसेवक गळाला लावण्याची तयारी केली आहे, तर कॉँग्रेसनेदेखील सर्व नगरसेवकांची खातरजमा केल्यानंतर कोणीही नगरसेवक अन्य पक्षाच्या गळाला लागला नसल्याचा दावा केला आहे.महापौरपदाच्या निवडणुकीसाठी झपाट्याने राजकीय हालचाली सुरू झाल्या आहेत. दोन नगरसेवक सेनेच्या गळाला लागल्याचे कळाल्यानंतर काल रात्री मनसेचे नगरसेवक मुंबईला पाठविण्यात आले. शहापूरजवळ मुक्काम केल्यानंतर हे सर्व नगरसेवक दुपारी राज ठाकरे यांना भेटले. यावेळी नीलेश शेलार आणि शोभा शिंदे हे मुंबईत थेट राज ठाकरे यांना भेटण्यास येऊ असे सांगूनही प्रत्यक्षात आलेच नाही. सुजाता डेरे या आजारी असल्याने त्या अनुपस्थित होत्या. भाजपाच्या नेत्यांशी चर्चा सुरू असून, कुठल्याही परिस्थितीत महापौर मनसेचाच होईल, असे सांगतानाच राज ठाकरे यांनी महापौर होण्यासाठी थेट जबाबदारी स्वत:च्या शिरावर घेतली आहे. त्यानंतर मनसेचे नगरसेवक गुजरातला रवाना झाले. दरम्यान, शिवसेनेत सुधाकर बडगुजर यांची उमेदवारी जवळपास निश्चित मानली जात असून, त्यासाठी विधानसभेच्या दोन इच्छुकांनी प्रतिष्ठा पणाला लावली आहे. त्यामुळे अन्य पक्षांतील काही नगरसेवक फोडण्यासाठी जोरदार प्रयत्न सेनेकडून सुरू आहेत. दरम्यान, कॉँग्रेस नगरसेवकांची बैठक गुरुवारी पक्षाचे गटनेता उत्तमराव कांबळे यांच्या दालनात झाली. माजी राज्यमंत्री डॉ. शोभा बच्छाव, पक्ष प्रवक्ता हेमलता पाटील बैठकीस उपस्थित होते. कॉँग्रेसचे जे दोन नगरसेवक शिवसेनेच्या गळाला लागल्याची चर्चा होती त्यापैकी एकजण बैठकीस उपस्थित होता, तर दुसऱ्या नगरसेवकाशी संपर्क झाला आहे. पक्षाच्या बैठकीला काही नगरसेवक विविध कारणांमुळे उपस्थित नसले तरी त्यांनी पक्षाला तसे कळविले असल्याचे सांगण्यात आले. देशात आणि राज्यात आघाडी असल्याने राष्ट्रवादी कॉँग्रेसबरोबरच राहण्याचे ठरविण्यात आले. तथापि, गेल्या वेळेप्रमाणे राष्ट्रवादीने बहिष्कार घालू नये, अशी अट असेल तरच आघाडी करावी, असे ठरविण्यात आले. त्यानुसार राष्ट्रवादीचे गटनेता प्रा. कविता कर्डक, शहराध्यक्ष अर्जुन टिळे आणि माजी गटनेता विनायक खैरे यांच्या उपस्थितीत बैठक घेण्यात आली. त्यांना तसे स्पष्ट करण्यात आले. (प्रतिनिधी)आघाडीतील इच्छुक तयारीतकॉँग्रेस नगरसेवकांच्या बैठकीत ठरल्यानंतर महापौर-पदासाठी शाहू खैरे आणि उपमहापौरपदासाठी राहुल दिवे इच्छुक आहेत. तसेच राष्ट्रवादीकडून विनायक खैरे, तसेच विक्रांत मते इच्छुक आहेत. राष्ट्रवादीची सदस्य संख्या अधिक असल्याने राष्ट्रवादीला प्राधान्यक्रम देण्याचे ठरविण्यात आले. यासंदर्भात रात्री उशिरा कॉँग्रेस गटनेता उत्तमराव कांबळे यांच्या निवासस्थानी बैठक सुरू होती.नाशिक : राज ठाकरे यांनी भाजपाच्या नेत्यांशी चर्चा सुरू असल्याने महापौरपदाच्या निवडणुकीबाबत मनसे नगरसेवकांनी निश्चिंत राहावे, असे स्पष्ट केले असताना दुसरीकडे भाजपा सेनेशी चर्चा करीत असल्याने स्थानिक पातळीवर संभ्रम निर्माण झाला आहे. अर्थात, महापौर निवडणुकीसाठी सेना, भाजपा आणि मनसे अशी आघाडी करण्याचा भाजपाचा प्रयत्न असल्याचे सांगितले जात आहे, तर दुसरीकडे मनसेने नगरसेवक सेनेने फोडल्याने ते एकत्र येण्याची शक्यता कमी आहे.