दरवर्षी शहरातील मुस्लीम बांधव रमजान व बकरी ईदच्या औचित्यावर सामूहिकरीत्या इदगाह मैदानावर एकत्र येत नमाजपठण करतात. या पारंपरिक प्रथेला अनेक वर्षांपासूनचा इतिहास असून, महापालिका प्रशासन या ठिकाणी बस टर्मिनल उभारण्याचा घाट घालत आहे. त्यामुळे मुस्लीम समाजाच्या हक्काच्या जागेवर मनपा प्रशासनाकडून अतिक्रमण केले जात असल्याची भावना शिष्टमंडळाने निवेदनाद्वारे भुजबळ यांच्याकडे मांडली. यावेळी भुजबळांनी या संदर्भात चर्चा करत, मनपा आयुक्तांकडून माहिती मागविणार असल्याचे आश्वासन शिष्टमंडळाला दिले. महापालिकेच्या प्रस्तावित टर्मिनलसाठी प्रशासनाने दुसरी जागा निवडावी, अशी मागणी यावेळी करण्यात आली.
शहाजहानी इदगाह मैदानाची जागा शासन वक्फ ट्रस्ट नोंदणीकृत आहे. या जागेच्या सातबारा उताऱ्यावरही मुस्लीम समाजासाठी निमाजगाहची जागा अशी नोंद असल्याचे यावेळी शिष्टमंडळाकडून सांगण्यात आले. याप्रसंगी नगरसेविका समीना मेमन, माजी नगरसेवक हाजी निजाम कोकणी, सिराज कोकणी, गुलजार कोकणी, हाजी सलीम मिर्झा, एजाज रजा मकरानी, हाजी जाकीर आदी उपस्थित होते.
------