दुचाकीला धडकून चारचाकीचालक फरार

नाशिक : मुंबई नाका परिसरात चारचाकीचालकाने भरधाव वेगाने वाहन चालवत दुचाकीला धडक दिल्यामुळे दुचाकीस्वार जखमी झालेला असतानाही व चारचाकीचालकाने पोलिसांना घटनेची माहिती न देता घटनास्थळावरून पळ काढल्याचा प्रकार समोर आला आहे.

पोलिसांनी दिलेल्या माहितीनुसार, अज्ञात वाहनचालकाने मारुती ८०० वाहनातून वडाळा नाक्याकडून मुंबई नाक्याकडे जाताना भरधाव वेगाने वाहन चालवत दुचाकीला (एमएच १५, एफके ८७६७ ) जोरदार धडक दिली. या अपघातात दुचाकीस्वार मतीन खलील शेख यांना डाव्या हाताला व उजव्या पायाला गंभीर दुखापत होऊन फॅक्चर झाले आहे. मात्र चारचाकीचालकाने घटनेची माहिती पोलिसांना न देताच तो घटनास्थळावरून फरार झाला. त्यामुळे जमील खलील शेख यांनी मुंबई नाका पोलीस ठाण्यात अज्ञात वाहनचालकाविरोधात दिलेल्या फिर्यादीवरून गुन्हा दाखल केला असून, पोलीस चारचाकी चालकाचा शोध घेत आहेत.