नाशिक : पित्याच्या विवाहबाह्य संबंधांचे गुपित मुलाला माहीत झाले आणि पित्याने दीड एकर शेती स्वत:च्या प्रेयसीच्या नावावर केल्याने त्यास मुलाने कडाडून विरोधही केला म्हणून मनात राग धरत पोटच्या २८ वर्षीय तरुण मुलाचा गळा आवळून जन्मदात्या पित्याने खून केल्याची धक्कादायक घटना घडली आहे. याप्रकरणी संशयित आरोपी पशुवैद्यकीय अधिकारी प्रभाकर माळवाड यास पोलिसांनी बेड्या ठोकल्या आहेत.
याबाबत पोलिसांकडून मिळालेली माहिती अशी, नाशिक-पुणे महामार्गावरील जनरल वैद्यनगर परिसरात राहणारे देवळा पशुसंवर्धन दवाखान्यातील पशुवैद्यक संशयित प्रभाकर माळवाड व त्यांचा मुलगा निलेश माळवाड आणि फिर्यादी आई जयश्री यांनी रविवारी (दि.३) रात्री सोबत जेवण केले. यावेळी मुलगा निलेश याने वडिलांना ‘पोल्ट्री फार्म सुरू करून द्या’ असे सांगितले. यावेळी संशयित प्रभाकर यांनी त्याला दम देत ‘तू काही कामाचा नाही, त्यामुळे मी तुला काहीही देणार नाही’ असे सांगत खडसावले. यावेळी दोघा पिता-पुत्रांमध्ये रात्री कडाक्याचे भांडण झाले. जयश्री यांनी मध्यस्थीने त्यांचे भांडण मिटविले. माळवाड दाम्पत्य त्यांच्या खोलीत झोपले व मुलगा निलेश हा त्याच्या बेडरूममध्ये झोपलेला असताना सोमवारी पहाटेच्या सुमारास निलेश याचा जोरजोराने ‘आई-आई’ असा ओरडण्याचा आवाज कानी आल्याने जयश्री यांनी त्याच्या खोलीत धाव घेतली असता संशयित प्रभाकर हे त्यांच्या हाताने गळा आवळत असल्याचे त्यांना दिसून आले. यावेळी त्यांनी सोडविण्याचा प्रयत्न केला असता प्रभाकर यांनी स्वत:च्या पत्नीला ढकलून देत निलेश प्रभाकर माळवाड (२८) यास गळा दाबून त्यास ठार केल्याचे त्याची आई जयश्री यांनी पोलिसांना दिलेल्या फिर्यादीत म्हटले आहे. याप्रकरणी पोलिसांनी संशयित प्रभाकर यास अटक केली असून जयश्री यांनी दिलेल्या फिर्यादीवरून त्यांच्याविरुद्ध खुुनाचा गुन्हा दाखल केला आहे.
---
आई-वडिलांच्या नात्याची प्रतिमा मलीन
जन्मदात्या पित्याने ‘आज तुला संपवूनच टाकतो’ असे म्हणत मुलगा साखरझोपेत असताना त्याच्या छातीवर बसून गळा आवळून ठार केल्याच्या घटनेने पिता-पुत्राच्या नात्याला काळिमा फासली गेली. काही दिवसांपूर्वीच आईने आपल्या प्रियकराच्या मदतीने एका चिमुकल्याचा काटा काढल्याची घटना उघडकीस आली होती. या दोन्ही घटना शहरात लागोपाठ घडल्याने आई-वडिलांच्या नात्याची प्रतिमाही जनमानसात मलीन झाली आहे.