---
नाशिक : इस्लामी संस्कृतीचा महान व सर्वात मोठा सण रमजान ईदवर (ईद-उल-फित्र) मागील वर्षाप्रमाणे यंदाही कोरोनाच्या दुसऱ्या लाटेचे गंभीर सावट आहे. जिल्ह्यात उद्यापासून पुढील दहा दिवसांचा कडक लॉकडाऊनही घोषित करण्यात आला आहे. यामुळे यावर्षीही शहरातील शहाजहाँनी इदगाह मैदान सुने-सुने राहणार आहे. येत्या शुक्रवारी ईद साजरी होण्याची शक्यता वर्तविली जात आहे.
रमजान ईद, बकरी ईद हे दोन प्रमुख सण मुस्लीम बांधवांचे सर्वात मोठे सण म्हणून ओळखले जातात. या सणाच्या दिवशी धार्मिक परंपरेनुसार व धर्माचे प्रेषित हजरत मुहम्मद पैगंबर यांनी दिलेल्या शिकवणीनुसार सामुदायिकरित्या खुल्या आकाशाखाली अर्थात इदगाह मैदानावर नमाज पठण केले जाते. त्यामुळे या सणाच्या दिवशी समाजबांधवांनी इदगाह मैदान गजबजलेले असते. मात्र, गेल्या वर्षीप्रमाणे यावर्षी कोरोनाची साथ तेजीत असून, संसर्ग शहरासह ग्रामीण भागातसुद्धा अधिक फैलावत आहे. या पार्श्वभूमीवर शासनाकडून कडक निर्बंध घालण्यात आले आहेत. सर्व प्रकारचे धार्मिक, सामाजिक, सांस्कृतिक सोहळे रद्द करण्याचे आदेश देण्यात आले आहेत. महिनाभरापासून सर्व धार्मिक प्रार्थनास्थळेही बंद करण्यात आली आहेत. येत्या बुधवारपासून नाशिकमध्ये कडक लॉकडाऊन घोषित करण्यात आला आहे. यामुळे यंदा समाजबांधवांना ईदची नमाज आपापल्या घरांमध्येच पठण करावी लागणार असल्याचे दिसते.
----इन्फो---
बुधवारी चंद्रदर्शनाची शक्यता
रमजान पर्वचे २७ उपवास पूर्ण झाले असून, येत्या बुधवारी उद्या संध्याकाळी २९ उपवास पूर्ण होणार आहेत. यानिमित्ताने चंद्रदर्शन घडण्याची शक्यता वर्तविली जात आहे. संध्याकाळी चंद्रदर्शन घेण्याचा प्रयत्न करावा, असे आवाहन करण्यात आले आहे. चंद्रदर्शन घडल्याची अधिकृत ग्वाही प्राप्त झाल्यास शहर ए खतीब हाफिज हिसामुद्दीन अशरफी यांच्याकडून ईद साजरी करण्याबाबतची घोषणा करण्यात येईल. चंद्रदर्शन घडले नाही तर गुरुवारचा तिसावा उपवास पूर्ण करून शुक्रवारी रमजान ईद साजरी केली जाईल.
-----इन्फो---
''ईद''ची खरेदी रद्द; गरजूंना मदतीचा हात
कोरोनाचे संकट बघता समाजबांधवांनी यावर्षीही ईदची खरेदी पुढे ढकलली आहे. बाजारपेठा बंद असल्याने अनावश्यक खर्चाला फाटा देत गरजूंसाठी राबणाऱ्या विविध संस्थांचे हात बळकट करण्यासाठी समाजबांधव प्रयत्नशील असल्याचे दिसून येते. महिनाभरापासून कोरोनाची तीव्र झालेली साथ, रोजगाराचा निर्माण झालेला प्रश्न लक्षात घेता ''जकात'', ''फित्रा''च्या माध्यमातून समाजातील धनिक वर्ग गोरगरीब कुटुंबांपर्यंत आर्थिक स्वरूपात दान तसेच धान्यदान पोहोच करण्याचा प्रयत्न करत आहेत. बहुतांश सामाजिक सेवाभावी संस्थांनी अशा कुटुंबांचा शोध घेत ''रमजान किट'' अर्थात शिरखुर्मासाठी लागणारा सुका मेवा, किराणा वस्तू पुरविण्यास सुरुवात केली आहे.