नाशिक : विदेशात नाेकरी आणि शिक्षणासाठी जाणाऱ्यांना वाहन चालवण्याचा परवाना काढावा लागतो. त्याची वैधता एक वर्षासाठी असते. मात्र, ज्याप्रमाणे देशांतर्गत वाहन परवान्याचे नूतनीकरण करता येते, तशी तरतूद विदेशी परवान्यांसदर्भात नसल्याने अशाप्रकारे परवाने काढणाऱ्यांची अडचण होत आहे.
विदेशात जाणे आता कठीण राहिलेले नाही. विदेशात शिक्षणासाठी जाणाऱ्या विद्यार्थी तसेच नोकरदारांना अनेक वर्षे तेथे राहावे लागते. कामाच्या सोयीने प्रवास करण्यासाठी अनेकांना स्वत:चे खासगी वाहन वापरावे लागते. त्यासाठी लागणारे लायसन म्हणजेच वाहन चालवण्याचा परवाना विदेशात काढता येतो. त्याचप्रमाणे तो भारतात देखील काढता येतो. आंतरराष्ट्रीय वाहन परवान्यासाठी आवश्यक कागदपत्र तसेच पारपत्र, व्हीसा त्यासाठी आवश्यक असतो. साधारणत: एक हजार रुपये त्यासाठी खर्च येतो. मात्र, ज्याप्रमाणे अन्य परवाने नूतनीकरणासाठी काही ठरावीक वर्षांनंतर जावे लागते तशी तरतूद या प्रकारच्या वाहन परवान्यात नाही. अवघ्या एक वर्षासाठीच हा परवाना दिला जातो आणि संबंधित व्यक्ती भारतात आल्यानंतर मुदतबाह्य झालेल्या परवान्याचा त्याला पुन्हा लाभ घ्यायचा असेल तर त्याला थेट नवीनच लायसन काढावे लागते.
इन्फो....
असा काढा आंतरराष्ट्रीय वाहन परवाना
१- आंतरराष्ट्रीय वाहन परवाना काढायचा असेल तर नाशिकसह आरटीओच्या कोणत्याही कार्यालयात काढता येतो. त्यासाठी तुमचा भारतात वाहन चालवण्याचा परवाना काढणे आवश्यक आहे.
२- आंतरराष्ट्रीय लायसन काढण्यासाठी अन्य नेहमीच्या पुराव्यांबरोबरच पासपोर्ट तसेच व्हीसा असणे आवश्यक आहे.
३ साधारणत: असे लायसन काढण्यासाठी दोन ते तीन दिवसांचा कालावधी लागतो.
४ अशाप्रकारचा परवाना हा मॅन्युअल असतो. त्यासाठी एक हजार रुपयांचा खर्च येतो.
इन्फो...
कोण काढतो हा परवाना
१ विदेशात नोकरी आणि शिक्षणासाठी विद्यार्थी जातात. काही जण व्यवसायासाठी जातात. तेथे भ्रमंतीसाठी वाहने वापरली जातात.
२ विदेशात कामकाजासाठी फिरावे लागत असल्याने आपल्या सोयीच्या वेळी आणि ठिकाणी पोहाेचण्यासाठी स्थानिक वाहतूक साधनांवर अवलंबून राहण्यापेक्षा अनेक जण खासगी वाहन वापरतात.
३ काही जण स्वत:चे वाहन घेऊन विदेशात जातात किंवा काही जण तेथे वाहन भाड्याने घेतात.
४ वाहन चालवण्यासाठी आंतरराष्ट्रीय परवाना भारतातूनच काढून अनेक जण जातात. हा परवाना अवघ्या एका वर्षासाठीच असतो.
कोट...
विदेशात जाण्यासाठी भारतात आंतरराष्ट्रीय वाहन चालवण्याचा परवाना काढता येतो. पासपोर्ट आणि व्हीसासह अन्य कागदपत्र असतील तर वाहन परवाना काढता येतो. मात्र, त्याची मुदत एक वर्षाची असते. मुदत संपल्यानंतर ती व्यक्ती विदेशात स्थायिक झाली असल्यास त्याला पुन्हा विदेशात परवाना काढावा लागतो.
- वासुदेव भगत, सहायक प्रादेशिक परिवहन अधिकारी,
इन्फो...
कोरोना काळात संख्या घटली
२०१८- ४१०
२०१९- ४६६
२०२०- १०३
२०२१- ६६