नाशिक : जिल्ह्यातील कोरोनाचे प्रमाण वाढत असताना कोरोनाबाधित गर्भवती महिलांच्या प्रमाणातही वाढ झाली आहे. त्यामुळे कोरोनाबाधित गर्भवतींसाठी सज्ज ठेवलेला जिल्हा रुग्णालय कक्षातील स्वतंत्र कक्ष पुन्हा भरलेला आहे. गत एप्रिल ते मार्चअखेरपर्यंतच्या वर्षात जिल्हा रुग्णालयात तब्बल १३५ कोरोनाबाधित गर्भवतींचे बाळंतपण सुखरूपपणे पार पडले आहे.
गर्भवती महिलांच्या आणि वॉर्डमधील सर्व गर्भवतींच्या सुरक्षिततेसाठी आणि सुविधेसाठी गत वर्षापासूनच त्यांची कोरोना चाचणी करून घेण्यात येत आहे. त्यात कोरोना चाचणीत बाधित आढळणाऱ्या महिलांसाठी जिल्हा रुग्णालयातच स्वतंत्र कक्ष उभारण्यात आला असून, त्यात तब्बल २० बेड ठेवण्यात आले आहेत. तिथे आवश्यकतेनुसार ऑक्सिजनचीही व्यवस्था करण्यात आली आहे. या विशेष कक्षात दाखल होणाऱ्या गर्भवती कोरोनाबाधित महिलांसाठी तज्ज्ञ डॉक्टर, परिचारिका, तसेच अन्य सर्व स्टाफचीही स्वतंत्र नियुक्ती करण्यात आली. गत वर्षभरात कोरोनाबाधित १३७ महिलांची डिलिव्हरी सिव्हिल हॉस्पिटलमध्ये करण्यात आली आहे. त्यात केवळ दोन अपवाद वगळता अन्य सर्व महिला सुखरूपपणे बाळंत होऊन तसेच कोरोनामुक्त होऊन आपापल्या घरी परतल्या आहेत.
इन्फो
७४ महिलांची नॉर्मल, ६३ सिझर
कोरोनाच्या गंभीर रुग्णांप्रमाणेच जिल्हा रुग्णालयात कोरोनाबाधित गर्भवती महिलांसाठी स्वतंत्र कक्ष उभारण्यात आला आहे. ऑगस्ट आणि सप्टेंबरच्या दोन महिन्यांमध्ये तर काही दिवस हे २० बेड्सही अपुरे पडण्याची परिस्थिती निर्माण झाली होती. त्याप्रमाणेच मार्च आणि एप्रिल महिन्यापासून पुन्हा एकदा बेड अपुरे पडण्याची स्थिती निर्माण होत आहे. आतापर्यंत झालेल्या १३७ महिलांच्या डिलिव्हरीदरम्यान गत वर्षभरात ७४ महिलांची नॉर्मल तर ६३ महिलांची सिझर डिलिव्हरी करण्यात आली.
इन्फो
मातांकडून कृतज्ञता
कक्षातील स्टाफने सर्व परिस्थिती अत्यंत प्रभावीपणे हाताळल्यामुळेच त्या स्थितीतही सर्व महिला कोरोनामुक्त होण्यासह त्यांची बालकेही निरोगी जन्माला आली. त्यामुळे या सर्व बाधित महिलांनी आणि त्यांच्या कुटुंबीयांनी रुग्णालयातील सर्व डॉक्टर्स, नर्स, वॉर्डबॉयचे आभार मानून या सेवेबद्दल ऋण व्यक्त करतात.
कोट
या सर्व आरोग्य कर्मचाऱ्यांच्या पथकाने अत्यंत प्रभावीपणे काम केल्यामुळेच गत वर्षभरापासून कोरोनाबाधित महिला दाखल झाल्या. त्यातील दोन अपवाद वगळता अन्य सर्व महिला सुखरूपपणे प्रसूत झाल्या. विशेष म्हणजे, या १३५ महिलांची बाळेही सुखरूप आहेत. त्यांना कोणत्याही प्रकारची कोरोनाची बाधा आढळून आली नाही.
- डॉ. गणेश गोसावी, स्त्रीरोग विभागाचे तज्ज्ञ