निसर्गरम्य वणी परिसरात वावरतात आता गुन्हेगार

निसर्गरम्य वणी परिसरात वावरतात आता गुन्हेगार

 वणी : परिसरात निसर्गरम्य ठिकाणी फिरायला येणाऱ्या पर्यटकांबरोबरच आता गुन्हेगारी प्रवृत्तीचे काही टोळकेही येत असल्याने या भागात गुन्ह्यांची संख्या वाढली असून, डोंगर, धरण परिसर असल्याने अपघातांच्या संख्येतही वाढ झाली आहे.ठाणे येथील चेकमेट कंपनीतील दरोड्या प्रकरणी नाशिक भागातील दोन संशयितांना वणी परिसरातून ताब्यात घेण्यात आल्याने परिसरात चर्चेचा विषय ठरला आहे. चेकमेटचे धागेदोरे वणी परिसरात जुळल्याने संशयितांनी यापूर्वी या भागाची तपासणी करून लुटीचा बनाव रचल्याची वंदता आहे. मंगळवारी (दि. ५) रात्री सव्वा अकराच्या सुमारास पोलिसांनी १०८ रुग्णवाहिकेला फोनद्वारे कृष्णगाव परिसरात दोनजण जखमी असल्याची माहिती दिली. रुग्णवाहिकेद्वारे जखमींना वणीच्या ग्रामीण रु गालयात दाखल करण्यात आले. संशयितांना विचारणा केली असता अज्ञातांनी कृष्णगाव परिसरात मारहाण करून रक्कम लांबविल्याची माहिती त्यांनी दिली. सदर संशयित मद्याच्या धुंदीत माहिती देत असल्याचे वैद्यकीय अधिकारी डॉ. राजेंद्र बागुल यांच्या निदर्शनास आले. त्यांनी तत्काळ पोलिसांना कळविले. संशयितांनी दिलेल्या माहिती अन्वये दरोड्याचा गुन्हा दाखल करण्यात आला. सदर संशयित दारूच्या प्रभावाखाली असल्याने ते जबाब देण्याच्या स्थितीत नसल्याची माहिती डॉ. बागुल यांनी पोलीसांना दिली. कृष्णगाव येथील कथित लुटीचे स्थान वणी ग्रामीण रुग्णालयापासुन दोन किलोमीटर अंतरावर आहे. तपासात रात्री १० वाजेच्या सुमारास हा कथित प्रकार घडला. गस्तिपथक त्या भागात असल्याने जखमींना त्वरित रुग्णालयात दाखल करणे शक्य झाले. दरम्यान, उपचारानंतर दोघांना जिल्हा रु ग्णालयात दाखल करण्यात आले. पोलीस उपअधीक्षक देवीदास पाटील यांनी तपासाची सूत्रे हाती घेतली. तेव्हा ठाणे येथील चेकमेट कंपनी दरोडा प्रकरणातील हे संशयित असल्याचे पुढे आले़गुजरात राज्यातील गंभीर स्वरूपाचे गुन्हे दाखल असणारा अमीन मन्सुरी कृष्णगाव येथे टमाटा व्यापारी म्हणून वास्तव्यास होता. गुजरात पोलिसांनी ओझरखेड धरणावरून त्याला पकडले होते. त्याच्याकड बंदूक मिळून आली होती. तेव्हाच्या तपासात त्याने परिसरात धाडसी चोऱ्या केल्याचे उघड झाले होते. काही दिवसांपूर्वी नाशिक भागातील इंजिनिअरिंग कॉलेजचे दोन विद्यार्थी धरणात बुडून मृत पावले. त्या घटनेबाबत तर्कवितर्क करण्यात आले होते. या प्रतिनिधिक उदाहरणावरून सदर परिसर गुन्हेगारी पार्श्वभूमी असणाऱ्या घटकांचा अड्डा असल्याचे बोलले जात आहे. विविध मार्गाने रिलॅक्स होण्यासाठी ठरावीक शहरी भागातील अपप्रवृत्ती या ठिकाणी हजेरी लावतात, अशी दबक्या आवाजात चर्चा आहे. शहरी भागातील गुंडांना हाताशी धरून सुरगाणा येथील व्यापाऱ्याला लुटण्याचा प्रकार स्मृती आड नाही. माळे फाट्यावरील पेट्रोलपंप लूट प्रकरण अजूनही नागरिकांच्या स्मरणात आहे. वणी व परिसरात सहजगत्या वावरणे किंवा पोलिसांना आव्हान देणारे कृत्य केले तरी चालू शकते अशी गुन्हेगारी घटकांची भूमिका सामान्यांच्या जिवात धडकी भरविणारी आहे. कथित लुटीचा बनाव रचणारे याच श्रेणीतील आहेत. पोलीस उपअधीक्षक देवीदास पाटील यांनी या प्रकरणाचा सखोल तपास केल्याने संबधितांचे बिंग फुटले व डाव उधळला गेला; मात्र अशा घटकांचे मनोधैर्य खच्ची करण्यासाठी योग्य ती पावले उचलणे गरजेचे असल्याचा सूर परिसरातून उमटतो आहे. ( वार्ताहर )