नाशिक- गोदावरीसह अन्य नद्यांचे प्रदूषण टाळण्यासाठी नाशिक महापालिकेच्या वतीने दरवर्षी प्रमाणे यंदाही राबवण्यात आलेल्या विसर्जित मूर्ती दानाच्या आवाहनाला चांगला प्रतिसाद मिळाला असून एकूण १ लाख १३ हजार ८६१ मूर्तींचे संकलन करण्यात आले आहे. याशिवाय यंदा प्रथमच मोठ्या गृहनिर्माण संस्थेसाठी राबवण्यात आलेल्या 'टॅँक ऑन विल्स' म्हणजेच फिरत्या कृत्रिम तलावांच्या उपक्रमालादेखील चांगला प्रतिसाद मिळाला असून एकूण१०४८ मूर्तींचे दान मिळाल्याने हा प्रयोग देखील कमालीचा यशस्वी ठरला आहे. नाशिक महापालिकेच्या वतीने गणेश उत्सव पर्यावरणपूरक व्हावा यासाठी मिशन विघ्नहर्ता राबवण्यात आले होते. कोराेनाची दुसरी लाट ओसरली असली तरी संभाव्य तिसरी लाट लक्षात घेता गर्दी आणि त्यातून होणारा संसर्ग टाळण्यासाठी महापालिकेने ऑनलाईन टाईम स्लॉट बुकिंगची व्यवस्था करण्यात आली होती. त्याचा दोन हजारांहून अधिक नागरीकांनी लाभ घेतला. अशाप्रकारच्या लिंकचा वापर करणाऱ्या नागरिकांना महापालिकेने क्यू आर कोड जनरेट झाल्यानंतर ई प्रमाणपत्रही प्रदान केले. तसेच २ हजार किलोहूनही अधिक अमोनियम बायकार्बोनेट घरच्या घरीच गणेश विसर्जन करण्यासाठी दिले होते.
महापालिकेच्या वतीने दरवर्षी अनंत चतुर्दशीच्या दिवशीच गणेश मूर्ती संकलन यापूर्वी करण्यात येत होते. यंदा मात्र महापालिकेने दीड दिवसांचा गणपती, तीन दिवस, पाच दिवस आणि सातव्या दिवशी विसर्जित होणाऱ्या एकूण ५ हजार १५१ मूर्ती संकलित करण्यात आले आहेत. तर अखेरच्या दिवशी २७ अधिकृत विसर्जन स्थळे घोषित करण्यात आली होती तर ४३ कृत्रिम तलाव घोषित करण्यात आले होते. याशिवाय महापालिकेने ५० पेक्षा अधिक सदनिका असलेल्या गृहनिर्माण संस्थांवर कारवाई करण्यात आली आहे.
इन्फो...
निर्माल्याचे संकलन
दरवर्षी प्रमाणे यंदाही महापालिकेने निर्माल्य संकलन केले. यंदा एकूण तब्बल ११७.८५ टन निर्माल्य संकलित करण्यात आले. पंचवटी विभागातून सर्वाधिक ३०.८४ टन, त्याखालोखाल सातपूर २५.२५ टन, सिडको १९.१६ टन, नाशिक पश्चिम १६.३४ टन, नाशिकरोड १४.८७, तर नाशिक पूर्व विभागातून ११.३९ टन निर्माल्य गोळा करण्यात आले. त्यासाठी महापालिकेने खास ७६ वाहनांची सोय करण्यात आली होती.