एकलहरेः नाशिक तालुक्याच्या पूर्व भागात दिवसभर उन्हाचा कडाका जाणवत असून, दुपारनंतर ढगाळ वातावरण होत असल्याने पाऊस पडण्याच्या भीतीने शेतकरी कांदे काढणी, गहू सोंगणीच्या कामात व्यस्त झाले असून, एकीकडे ग्रामीण भागात कोरोनाने थैमान घातलेले असताना दुसरीकडे शेतातील उभी पिके हातची जाण्याची भीती असल्याने शेतकरी वर्ग सहकुटुंब शेती कामात व्यस्त झाला आहे.
काही शेतकऱ्यांचा गहू तयार झाल्याने त्यांनी यापूर्वीच हार्वेस्टरच्या साहाय्याने गहू काढून मार्केटला नेला आहे. मात्र उशिरा पेरलेल्या गव्हाची कापणी काही ठिकाणी अजूनही सुरु आहे. नोव्हेंबर- डिसेंबरमध्ये लावलेला उन्हाळा व लाल कांदा काढण्याचे काम सर्वत्र मोठ्या प्रमाणात सुरु आहे. कांदे काढून झाल्यावर काही शेतकरी चाळीत साठवून ठेवतात तर काहींंना पैशांची गरज असल्याने विक्रीसाठी मार्केटला नेतात. बऱ्याच ठिकाणी नवीन लावलेली कोबी, फ्लॉवर, टोमॅटोतील तण निंदणीची कामे सुरु आहेत. सध्याच्या वातावरणातील बदलामुळे पिकांवर रोगाचा प्रादुर्भाव वाढला आहे. पाने कुरतडणारी अळी, लष्करी अळीचा प्रादुर्भाव वाढल्याने महागडी औषधे फवारणी करावी लागत आहे.त्यामुळे भांडवली खर्चात वाढ झाली असल्याचे शेतकरी सांगतात.
पूर्व भागातील सामनगाव, चाडेगाव, कोटमगाव, जाखोरी, चांदगिरी, मोहगाव, बाभळेश्वर, हिंगणवेढा, कालवी, गंगापाडळी, लाखलगाव, ओढा, शिलापूर, एकलहरे गाव, गंगावाडी या भागात गहू व कांदे काढून झाल्यावर खरीप हंगामातील पिकांसाठी ट्रॅक्टरने शेती नांगरणी करण्याची लगबग दिसून येत आहे.
-------
नगदी पिकावर भर
पूर्व भागातील शेतकरी इतर नगदी पिकांबरोबरच कोबी, फ्लॉवर, टमाटे, गवार, भेंडी, मेथी, शेपू, कोथिंबीर, कारले, गिलके, भोपळा ही भाजीपाला पिकेही बारमाही घेतात. सध्या नवीनच लावलेली कोबी, फ्लॉवर निंदणीची कामे सुरु आहेत. कोरोनामुळे इतर व्यापार उदिम बंद असला तरी भाजीपाला मार्केट काही अटी शर्तींवर सुरु असल्याने, भाजीपाला विक्रीसाठी सिन्नरफाटा मार्केट, नाशिक रोडच्या करन्सी प्रेस समोरील भाजीबाजार, जेलरोडच्या शनिमंदिर परिसरातील भाजीबाजार, लाखलगाव येथील गंगापाडळी चौफुली येथील भाजीबाजारात किरकोळ विक्री करुन शेतकरी कुटुंबाची गुजराण करीत आहेत.
कोट====
निकृष्ट कांदा बियाणे व वातावरणात वारंवार होणारा बदल याचा परिणाम झाल्याने कांद्याचे पोषण व्यवस्थित झाले नाही. अनेक ठिकाणी मोठ्या प्रमाणात डोंगळे आल्याने कांद्याची प्रतवारी व वजनही घटले आहे. महागडे बियाणे, औषधे, मजुरी याचा खर्च पाहता यंदा कांदा उत्पादनात घट झालेली दिसते.
-रतन धात्रक- शेतकरी, हिंगणवेढे.
(फोटो १४ एकलहरे)