चव्हाणच्या लॉकरमध्ये ६ किलोसोन्याची नाणी

केबीसी घोटाळा : दोन लॉकरची तपासणी

 नाशिक : राज्यभरात गाजलेल्या केबीसी घोटाळ्यातील प्रमुख संशयित भाऊसाहेब व आरती चव्हाण या दांपत्याच्या शहरातील दोन लॉकर्सची मंगळवारी (दि़ १०) आर्थिक गुन्हे शाखेच्या अधिकाऱ्यांनी तपासणी केली़ या लॉकरमध्ये सुमारे दोन कोटी रुपयांची सहा किलो ८०० ग्रॅम सोन्याची नाणी सापडली असून, ती केबीसीत गुंतवणूक वाढविणाऱ्या एजंटांना देण्यासाठी तयार करण्यात आल्याचा पोलिसांचा अंदाज आहे़आर्थिक गुन्हे शाखेच्या अधिकाऱ्यांनी मंगळवारी दुपारी केबीसीचा संचालक भाऊसाहेब व आरती चव्हाण यांच्या रविवार पेठेतील जानकी अपार्टमेंटमधील नगर अर्बन को-आॅप. बँकेतील लॉकरची तपासणी केली़ (पान ९ वर)या लॉकरमध्ये ६ किलो ६०० ग्रॅम सोन्याची नाणी आढळून आली़ यानंतर मेरी येथील स्टेट बँक आॅफ इंडियामधील लॉकरची तपासणी केली असता तेथे २०० ग्रॅम सोन्याची नाणी आढळून आली़नगर अर्बन व स्टेट बँक आॅफ इंडियाच्या या दोन्ही बँक लॉकरमधील मालमत्तेची आर्थिक गुन्हे शाखेच्या अधिकाऱ्यांनी दोन पंच व बँकेच्या अधिकाऱ्यांसमवेत पोलीस दप्तरी नोंद केली आहे़ सद्यस्थितीत ही मालमत्ता बँकेच्या लॉकरमध्येच ठेवण्यात आली असून, केबीसी प्रकरणात शासनाने नियुक्त केलेले उपजिल्हाधिकारी यावर निर्णय घेणार आहेत़ भाऊसाहेब चव्हाण याच्या आणखी एक लॉकरची तपासणी बाकी असून ती बुधवारी (दि़११) केली जाणार आहे़ दरम्यान, भाऊसाहेब चव्हाण याच्या भावाच्या नावे आणखी दोन लॉकर असून, ते उघडण्यासाठी लवकरच त्यांचा न्यायालयाकडून ताबा मागितला जाणार आहे़ चव्हाणचे हे तिसरे लॉकर व भावाच्या दोन लॉकरमध्ये आणखी किती सोन्याची नाणी निघतात याकडे नागरिकांचे लक्ष लागले आहे़ (प्रतिनिधी)