हांडे खूनप्रकरणी दोघे दोषी; २४ साक्षीदार फितूर

सूक्ष्म तपास : कागदपत्रांचा पुरावा महत्त्वाचा

नाशिक : मखमलाबाद रस्त्यावरील उदय कॉलनी परिसरात मार्च २०१४ मध्ये झालेल्या प्रवीण ऊर्फ समीर हांडे खून खटल्यात जिल्हा व सत्र न्यायालयाने शनिवारी (दि.७) सहा संशयित आरोपींपैकी दोघांना दोषी धरले, तर उर्वरित चौघा संशयितांना निर्दोष ठरविले आहे. याबाबत येत्या बुधवारी (दि.११) न्यायालयाकडून शिक्षेप्रकरणी अंतिम निकाल दिला जाणार आहे. उदय कॉलनीमध्ये ९ मार्च रोजी मध्यरात्री प्रवीण ऊर्फ समीर हांडे, दुर्गेश गवळी, स्वप्नील पवार हे तिघे गप्पा मारत उभे होते. दरम्यान, सराईत गुन्हेगार तुकाराम चोथे ऊर्फ तुक्या, नीलेश नेरूळकर, किशोर बरू, अमोल चांगले, पप्पू खैरे ऊर्फ विनोद, प्रवीण कुमावत यांनी येऊन स्वप्नीलला मारहाण करण्यास सुरुवात केली. यावेळी हांडे याने मध्यस्ती करत भांडण सोडविले. त्यानंतर हांडे आणि स्वप्नीलवरील सहा संशयितांच्या मागे एका शाळेजवळ गेले असता त्या ठिकाणी पुन्हा वादविवाद होऊन स्वप्नील व हांडे यांना संशयितांनी मारहाण करण्यास सुरुवात केली. यावेळी नेरूळकर याने मारहाणीसाठी कमरेचा पट्टा काढला असता त्याच्या कमरेला खोचलेला गावठी कट्टा खाली पडला.