मोहदरी घाटात महिलेला मृतदेह

मोहदरी घाटात महिलेला मृतदेह

सिन्नर : नाशिक - पुणे महामार्गालगत सिन्नरजवळ असलेल्या मोहदरी घाटात कुचलेल्या अवस्थेत महिलेला मृतदेह आढळून आल्याने खळबळ उडाली आहे. मोहदरी घाटाच्या पायथ्याशी असलेल्या बंधाऱ्याच्या पाण्यात पालथ्या अवस्थेत महिला पडलेली असल्याची माहिती दिलीप बिन्नर यांनी मोहदरीचे पोलीसपाटील मोहन सांगळे यांनी दूरध्वनीहून दिली. सांगळे यांनी सिन्नर पोलीस ठाण्यासोबत संपर्क साधून पोलिसांना घटनास्थळी पाचारण केले. पोलीस निरीक्षक किशोर नवले, सहाय्यक पोलीस निरीक्षक संदीपकुमार बोरसे, उपनिरीक्षक दीप्ती आठवले, हवालदार आर. बी. भवर, लक्ष्मण बदादे यांच्यासह पोलीस कर्मचाऱ्यांनी घटनास्थळी जाऊन खात्री केल्यानंतर ३० ते ३५ वयोगटातील महिला बंधाऱ्याजवळील पाण्यात मृत अवस्थेत पडलेली दिसून आली. सदर महिलेने अंगात लाल-पिवळसर रंगाची साडी घातली आहे. तिच्या गळ्यात मंगळसूत्र, कानातले व पायात तोरड्या आहेत. या महिलेच्या हातावर इंग्रजीत एस गोंदलेले आहे. दोन्ही हातात लाल रंगाच्या प्रत्येकी बारा बांगड्या आहेत. सदर महिलेचा चार ते पाच दिवसांपूर्वी मृत्यू झाल्याचा अंदाज नायगाव प्राथमिक आरोग्य केंद्राच्या वैद्यकीय अधिकारी डॉ.मनीषा भालेराव यांनी व्यक्त केला. त्यामुळे सदर मृतदेह कुचलेल्या अवस्थेत असल्याने जागेवर शवविच्छेदन करून मृतदेहाची विल्हेवाट लावण्यात आली. याप्रकरणी सिन्नर पोलीस ठाण्यात आकस्मिक मृत्यूची नोंद करण्यात आली आहे. सदर महिलेचा मृत्यू कशाने झाला किंवा घातपात आहे याबाबतचा उलगडा शवविच्छेदनाच्या अहवालानंतर होऊ शकेल. पोलीस निरीक्षक नवले यांच्या मार्गदर्शनाखाली उपनिरीक्षक आठवले करीत आहेत. (वार्ताहर)