बँक खाते काढण्याची सक्ती चुकीची

सातपूर : दीडशे रुपयांसाठी विद्यार्थ्यांना हजार रुपयांचे बँक खाते सक्तीचे केले आहे. त्यामुळे पालकांच्या चिंता वाढल्या आहेत. बँक खाते उघडणे अनेक पालकांना परवडणारे नसून हा क्लिस्ट निर्णय शासनाने रद्द करावा, अशी मागणी छावा क्रांतिवीर विद्यार्थी सेनेच्या वतीने विभागीय शिक्षण उपसंचालकांना दिलेल्या निवेदनाद्वारे केली आहे.

उन्हाळी सुट्टीतील शालेय पोषण आहार विद्यार्थ्यांना प्रत्यक्ष वितरित न करता त्याऐवजी आहाराचे अनुदान थेट विद्यार्थ्यांच्या बँक खात्यात जमा करण्याचा निर्णय शासनाने घेतला आहे. विविध शासकीय योजना व शिष्यवृत्ती घेणाऱ्या विद्यार्थ्यांचे बँक खाते आहे. परंतु हे प्रमाण अत्यल्प असल्यामुळे अनेक विद्यार्थ्यांना नवे बँक खाते उघडावे लागत आहे. सुट्टीतील ३५ दिवसांचे अनुदान पहिली ते पाचवी १५६ रुपये तर सहावी ते आठवीच्या विद्यार्थ्यांकरिता २३४ रुपये ठरणार आहे. कोरोना संकटामुळे अनेक पालकांची आर्थिक परिस्थिती हलाखीची असताना अशा परिस्थितीत शासनाने हा निर्णय घेतला असल्याने पालकांच्यासुद्धा चिंता वाढल्या आहेत.

किमान दीडशे रुपयांच्या निधीसाठी एक हजार रुपये ते पाचशे रुपये भरून बँक खाते उघडणे अनेक पालकांना परवडणारे नसून हा निर्णय शासनाने रद्द करावा, अशी मागणी होत आहे. विद्यार्थ्यांच्या बँक खात्यातच रक्कम जमा करण्याचा आग्रह का धरला जात आहे? विद्यार्थ्यांच्याच खात्यावर पैसे जमा करण्याचा आग्रह धरण्याऐवजी पालकांच्या बँक खात्यात पैसे जमा केले पाहिजेत, अशीही मागणी छावा क्रांतिवीर विद्यार्थी सेनेचे प्रदेश अध्यक्ष उमेश शिंदे, युवक प्रदेश अध्यक्ष शिवा तेलंग, प्रदेश महासचिव शिवाजी मोरे, नाशिक जिल्हा अध्यक्ष विजय खर्जुल आदींनी विभागीय शिक्षण उपसंचालक नितीन उपासनी यांना दिलेल्या निवेदनाद्वारे केली आहे. अन्यथा छावा क्रांतिवीर सेना संस्थापक अध्यक्ष करण गायकर यांच्या नेतृत्वाखाली विद्यार्थी सेनेच्या वतीने तीव्र आंदोलन केले जाईल, असाही इशारा देण्यात आला आहे.

फोटो : शालेय पोषणसाठी विद्यार्थी बँक खाते काढण्याचे क्लिष्ट नियम रद्द करण्याच्या मागणीचे निवेदन विभागीय शिक्षण उपसंचालक नितीन उपासनी यांना देताना छावा क्रांतिवीर विद्यार्थी सेनेचे प्रदेश अध्यक्ष उमेश शिंदे. समवेत शिवा तेलंग, शिवाजी मोरे, विजय खर्जुल आदी.

080721\08nsk_35_08072021_13.jpg

 शालेय पोषणसाठी विद्यार्थी बँक खाते काढण्याचे क्लिष्ट नियम रद्द करण्याच्या मागणीचे निवेदन विभागीय शिक्षण उपसंचालक नितीन उपासनी यांना देतांना छावा क्रांतिवीर विद्यार्थी सेनेचे प्रदेश अध्यक्ष उमेश शिंदे समवेत शिवा तेलंग,शिवाजी मोरे,विजय खर्जुल आदी.