पंचवटी, आडगाव तसेच म्हसरूळ या तीनही पोलीस ठाण्याच्या हद्दीत अन्न व औषध प्रशासन आणि पोलिसांनी केलेल्या संयुक्त कारवाईत महिनाभरात तब्बल १० संशयित आरोपींना बेड्या ठोकून त्यांच्याकडून जवळपास ३० इंजेक्शन जप्त केले आहे. पंचवटी परिसरातील जुना आडगाव नाका या ठिकाणी एका रुग्णालयात रुग्णाला एक इंजेक्शन ३० हजार रुपये किमतीला विक्री करताना खुद्द एका डॉक्टरला पोलिसांनी अटक केली होती. त्याच्याकडून पोलिसांनी तीन रेमडेसिविर इंजेक्शन जप्त केले होते. त्यानंतर मखमलाबादला एका वॉर्डबॉयकडून गुन्हे शाखेच्या पोलिसांनी तब्बल पाच
रेमडेसिविर जप्त केले होते. गेल्या आठवड्यात आडगाव पोलिसांनी आडगाव शिवारात असलेल्या के. केे. वाघ महाविद्यालयासमोर ५४ हजार रुपयांत दोन रेमडेसिविर इंजेक्शन विक्री करताना तीन नर्स व मेडिकल दुकानात काम करणाऱ्या चौघांना ताब्यात घेण्यात आले. या काळ्याबाजाराचे मुख्य केंद्र पंचवटी असले तरी, पालघर जिल्ह्यातून त्याचा पुरवठा केला जात असल्याचे पोलीस तपासात निष्पन्न झाले आहे.
चौकट===
पंचवटीत सातत्याने घडत असलेल्या या घटनांच्या मुळाशी जात चौकशी केली असता, पंचवटी भागात सर्वाधिक रुग्णालये व वैद्यकीय संस्था असून, अशा संस्थांमध्ये काम करणाऱ्या परिचारिका, वॉर्डबॉय हे होस्टेलमध्ये पंचवटीत वास्तव्यात आहेत. शहरातील अन्य रुग्णालयांमध्ये काम करणारे वॉर्डबॉय, परिचारिका देखील पंचवटीतच आश्रयास आहेत. कोरोनाबाधित रुग्णाला इंजेक्शन दिले किंवा नाही याची रुग्णालय व्यवस्थापनाकडून पुरेशी खात्री केली जात नाही, त्यामुळे परिचारिका, वॉर्डबॉयचे फावते, असे आजवर पोलीस तपासात निष्पन्न झाले आहे.