नाशिक : शहरातील मुंबईनाका पोलीस ठाण्याच्या हद्दीत एका चारचाकी वाहनाची काच फोडून तब्बल १५ लाख रुपयांची रोकड लुटल्याची घटना घडली आहे. या घटनेची पोलिसांनी गंभीर दखल घेतली असून संशयितांच्या तपासासाठी पोलिसांची चार पथके रवाना झाली आहेत.
पोलिसांनी दिलेल्या माहितीनुसार, मुंबईनाका परिसरातील हॉटेल छानजवळ शुक्रवारी (दि. ५) दुपारी ४ वाजेच्या सुमारास दुचाकीवरून दोघा संशयितांनी चारचाकी (एमएच १५ एचजी २८६८) मधून मागील काच फोडून १५ लाख रुपयांची रक्कम असलेली बॅग चोरून नेली. या प्रकरणी मयूर राजेंद्र भालेराव (रा. नावदरवाजा) यांनी मुंबईनाका पोलीस ठाण्यात फिर्याद दिली आहे. फिर्यादी मयूर दुपारी ४ वाजेच्या सुमारास हॉटेल छानच्या परिसरात गाडीजवळ उभा असताना दुचाकीवरून आलेल्या चोरट्यांनी त्यांच्या चारचाकीची मागील काच फोडून पैसे असलेली बॅग उचलून नेली. घटनेची माहिती मिळताच पोलिसांनी घटनास्थळी दाखल होत तपासाला सुरुवात केली असून पोलिसांची चार पथके संशयितांच्या तपासासाठी रवाना करण्यात आली आहे. या प्रकरणातील फिर्यादी युवक हा कर्मचारी असून तो चोरी झालेली रक्कम द्वारका येथून मुंबईनाक्याकडे पोहोचविण्यासाठी जात असताना ही घटना घडल्याची प्राथमिक माहिती समोर आली असून पोलीस या प्रकरणाचा अधिक तपास करीत आहेत.
===Photopath===
050221\05nsk_52_05022021_13.jpg
===Caption===
चारचाकी वाहनाची काच फोडून १५ लाख रुपयांची चोरी