यंदा जगण्याचे वर्ष असल्याने नियमांचे पालन करा

लोकमत न्यूज नेटवर्कशहादा : यंदा कोरोना विषाणू संक्रमणाच्या पार्श्वभूमीवर घरीच राहून गणेशोत्सव साजरा करायचा आहे. हे वर्ष फक्त जगण्याचे वर्ष असल्याने नागरिकांनी शासकीय नियमांचे पालन करून गणेशोत्सव साजरा करावा, असे आवाहन जिल्हा पोलीस अधीक्षक महेंद्र पंडित यांनी येथे केले.गणेशोत्सव व मोहरम सणाच्या पार्श्वभूमीवर येथे शांतता कमिटीची बैठक झाली. अध्यक्षस्थानी जिल्हा पोलीस अधीक्षक महेंद्र पंडित होते. बैठकीला नगराध्यक्ष मोतीलाल पाटील, अपर जिल्हा पोलीस अधीक्षक चंद्रकांत गवळी, प्रांताधिकारी डॉ.चेतन गिरासे, तहसीलदार डॉ.मिलिंद कुलकर्णी, जि.प.चे कृषी व पशुसंवर्धन सभापती अभिजित पाटील, पालिकेतील गटनेते प्रा.मकरंद पाटील, मुख्याधिकारी राहुल वाघ, शिवसेनेचे माजी जिल्हा प्रमुख अरुण चौधरी, आरपीआयचे जिल्हाध्यक्ष अरविंद कुमार, प्रा.लियाकतअली सैयद, एलसीबीचे निरीक्षक किशोर नवले उपस्थित होते.या वेळी पंडित म्हणाले की, कोरोना विषाणू संक्रमणामुळे गेल्या पाच महिन्यांच्या कालावधीत सर्वधर्मियांचे सण हे घरी राहूनच साजरे झाले आहेत. यासाठी शासनाने ११ जुलैच्या नियमावलीनुसार उत्सव साजरा करण्यास परवानगी दिली आहे. शहरात ३२ प्रतिबंधात्मक क्षेत्र असून याठिकाणी सार्वजनिक गणपती उत्सव साजरा करण्याला परवानगी दिली जाणार नाही. २१ आॅगस्टपासून मोहरमला सुरुवात होत आहे. या कालावधीत मुस्लिम बांधवांनी घरी राहूनच उत्सव साजरा करावे, असे आवाहनही त्यांनी केले. बैठकीत सुपडू खेडकर, प्रा.लियाकतअली सैयद, प्रा.मकरंद पाटील यांनीही मनोगत व्यक्त केले. प्रास्ताविक उपविभागीय पोलीस अधिकारी विक्रम कदम यांनी केले. सूत्रसंचालन विष्णू जोंधळे यांनी तर आभार पोलीस निरीक्षक किसन नजन पाटील यांनी मानले.