दुकान मालकाच्या प्रसंगावधानामुळे फसवणूक टळली

शहरातील डोंगरगाव रस्त्यावर माजी नगरसेविका शोभा दिलीप जैन व दिलीप जैन यांचे गुरू गौतम प्रोव्हिजन हे किराणा मालाचे दुकान आहे. दुकानात घरगुती सर्व किराणा मालाची विक्री होत असते. सद्या या दुकानासमोर मुख्य रस्त्याचे काम सुरू असल्याने रहदारी मोठ्या प्रमाणावर वाढली आहे. गेल्या आठ ते दहा महिन्यांपासून कोरोना महामारीमुळे सर्वच उद्योग-व्यवसाय, व्यापारावर मोठा परिणाम झाला आहे. दुकानदाराकडून मालाची उचल कमी झाली आहे. त्यातच घरगुती किराणा वस्तूचे भाव वाढल्यामुळे सर्वसामान्यांचे महिन्याचा बजेट चुकला आहे. शहादा परिसरात व शहरात सोन्याच्या दुकानावरून सोने खरेदी करण्याच्या बहाण्याने सोन्याची चोरी करणे, कपड्यांच्या दुकानावर जाऊन खरेदी करण्याच्या बहाण्याने महिला साड्या, फॅन्सी कपडे चोरी केल्याच्या घटना घडल्या आहेत. तसेच घरोघरी जाऊन महिलांना साडी विक्रीचा व्यवसाय करीत असल्याचा बहाणा करत त्यांच्याकडून घरातून चोरी करणे अशा अनेक घटना घडत असतानाच बुधवारी दुपारी १२ वाजेच्या दरम्यान ३५ ते ५० वयोगटातील नऊवारी साडी परिधान केलेल्या दोन महिला या दिलीप जैन यांच्या गुरू गौतम प्रोव्हिजन दुकानावर माल खरेदी करण्याकरिता पोहोचल्या. त्यांच्या हातात युरिया खताची खाली मोठी पिशवी होती. एका महिलेने दुकानात असलेल्या रफीक नावाच्या नोकराला २५ किलो डाळ मोजायला लावली. ती मोजल्यानंतर २५ किलो तांदळाचे मोजमाप करण्यास सांगितले. याच दरम्यान एका महिलेने मोजलेली पिशवी काही अंतरावर ठेवून आली. तांदूळ मोजल्यानंतर पुन्हा एक वस्तू मोजण्याचा बहाणा केला. याचदरम्यान नोकर रफीकला आपल्याला ठगवण्याचा प्रयत्न करीत असल्याचे लक्षात येताच त्याने डाळीची गोणी कुठे आहे, असे विचारले असता महिलांची तारांबळ उडाली. त्याचवेळेस दुकान मालक दिलीप जैन बाजूच्या दुकानात उभे असताना त्यांच्याकडून महिलांची चौकशी केली. महिलांची बोबडी वळायला लागली. संबंधित महिलांनी दुकान मालकाला परत आणून त्या ठिकाणाहून पोबारा केला. दुकान मालक जैन हे त्या महिलांना आरोळ्या मारून बोलवत असताना महिलांनी मात्र डोंगरगाव रस्त्याकडे पटापट चालण्याचा प्रयत्न केला. संबंधित महिला धुळ्याच्या असल्याचे बोलले जात आहे. महिलांनी तिथून पळ काढल्यामुळे दुकानातील नोकराला ठग बनण्यापासून वाचवण्यात आले. सद्या अशा काही महिला घरोघरी, दुकानात जाऊन बहाण्याने ठग बनवण्याचा प्रयत्न करीत आहेत. या घटनांचे पोलीस प्रशासनासमोर आव्हान जरी असले तरी नागरिकांनीही सतर्क राहणे गरजेचे आहे. अनोळखी महिला किंवा पुरुष दुकानावर, घरोघरी, कॉलनीत आढळल्यास संबंधित नागरिकांनी शहादा पोलीस निरीक्षक दीपक बुधवंत यांच्याशी संपर्क करावा, असे पोलीस प्रशासनाकडून कळविण्यात आले आहे.