शहादा तालुक्यात सेतू अभ्यासक्रम

कोरोनामुळे गेल्या दीड वर्षांपासून शाळा बंद आहे. असे असले तरी ऑनलाइन व ऑफलाइनच्या माध्यमातून शिक्षण सुरू आहे. शाळा बंद असल्या तरी विद्यार्थ्यांना गुणवत्तापूर्ण शिक्षण मिळावे म्हणून शिक्षण विभागातर्फे विविध उपक्रम राबविण्यात येत असून त्याचाच एक भाग म्हणून शिक्षण विभागाने ४५ दिवसांचा सेतू अभ्यासक्रम (ब्रीज कोर्स) सुरू केला आहे. शाळा बंद असल्याने काही विद्यार्थ्यांचे शैक्षणिक नुकसान झाले आहे. हे नुकसान भरून काढण्यासाठी सेतू अभ्यासक्रम प्रभावी ठरणार आहे. ४५ दिवसांच्या या अभ्यासक्रमात विद्यार्थ्यांना शाळेत न बोलावता विद्यार्थ्यांच्या घरापर्यंत शिक्षण पोहोचवले जाणार आहे. गावातील पाचवी ते दहावीपर्यंतच्या विद्यार्थ्यांना एकत्रित करून हा अभ्यासक्रम राबविला जाणार आहे. यंदा ज्या वर्गात विद्यार्थ्यांचा प्रवेश झाला असेल त्या वर्गाच्या मागील वर्गाच्या अभ्यासक्रमावर आधारित सेतू अभ्यासक्रम असल्याने मागील वर्षाचे शैक्षणिक नुकसान या उपक्रमातून भरून काढण्यात येईल. १५-१५ दिवसांच्या अंतराने तीन टप्प्यात हा अभ्यासक्रम राबविण्यात येत आहे. पहिला टप्पा १ जुलै ते १४ जुलै, दुसरा टप्पा १६ जुलै ते २९ जुलै व तिसरा टप्पा ३१ जुलै ते १४ ऑगस्ट असा आहे. या अभ्यासक्रमात १५, ३० व ४५ व्या दिवशी याप्रमाणे तीन चाचण्या घेऊन विद्यार्थ्यांची प्रगतीदेखील तपासली जाणार आहे. सेतू अभ्यासक्रम विद्यार्थ्यांच्या शैक्षणिक प्रगतीला नवसंजीवनी देणारा ठरणार असल्याने शिक्षकांबरोबरच पालक, ग्रामस्थ आणि गावाचे तलाठी, पोलीस पाटील, शिक्षण समितीचे पदाधिकारी, सरपंच, पं. स. सदस्य सारेच या शैक्षणिक हवनात सहकार्य करून आहुती टाकत आहेत. तालुक्यातील अनेक शाळांतील शिक्षक गटागटाने गावात जाऊन गावातील पाचवी ते दहावीच्या सर्व विद्यार्थ्यांना एकत्रित करून मार्गदर्शन करीत आहेत. या कामात शिक्षकांना गावातील पालक व ग्रामपंचायत पदाधिकाऱ्यांचेदेखील सहकार्य मिळत आहे. गावातील ग्रामपंचायत कार्यालय, मंदिर, समाज भवन अशा सार्वजनिक ठिकाणी विद्यार्थ्यांची शाळा भरवून सेतू अभ्यासक्रम राबविण्यात येत आहे. तालुक्यात सर्वच शाळांतर्फे सेतू अभ्यासक्रम सुरू करण्यात आल्याने गावागावांत शिक्षणाचा सेतू बांधला जात असून याकामी सर्वांचे सहकार्य लाभत असल्याने सेतू अभ्यासक्रमाला चांगला प्रतिसाद मिळत आहे.