मोबाइल युनिट गैरव्यवहाप्रकरणी वैद्यकीय अधिकाऱ्यांच्या निलंबनाचा प्रस्ताव

नवापूर तालुक्यातील वावडी, तळोदा तालुक्यातील बोरद व धडगाव तालुक्यातील धनाजे या ठिकाणी २०१६-१७ या वर्षात तयार करण्यात आलेल्या मोबाइल मेडिकल युनिटमध्ये गैरव्यवहार झाल्याच्या तक्रारी जिल्हा परिषदेकडे मिळाल्या होत्या. याप्रकरणी तत्कालीन मुख्य कार्यकारी अधिकारी आर. बी. सोमवंशी यांनी चाैकशी समिती गठित करून वैद्यकीय अधिकाऱ्यांच्या चाैकशा केल्या होत्या. चाैकशीतून मोबाइल युनिटसाठी वापरण्यात येणाऱ्या वाहनांचे लॉगबुक बनावट असल्याचे, तसेच औषधी खरेदी, वाहन दुरुस्ती यासह विविध वस्तूंची खरेदीही बोगसपणे करण्यात आल्याचे निष्पन्न झाले होते. याप्रकरणी या तिन्ही प्राथमिक आरोग्य केंद्रांचे तत्कालीन वैद्यकीय अधिकाऱ्यांना नोटिसा देऊन चाैकशीही झाली होती. दरम्यान, गेल्या चार वर्षांपासून थंड बस्त्यात असलेल्या या प्रकरणाचा निकाल लावण्याची तयारी सुरू झाली असून, जिल्हा आरोग्य विभागाने तिघांच्या निलंबनाचा प्रस्ताव आरोग्य संचालक यांच्याकडे दिला आहे. पुढे आरोग्य मंत्रालयात याबाबत निर्णय होणार असल्याची माहिती देण्यात आली आहे. दरम्यान, याप्रकरणी पुढे काय कारवाई होणार याकडे लक्ष लागून राहणार आहे. मोबाइल युनिटमध्ये लाखो रुपयांचा गैरव्यवहार केल्याचा ठपका चाैकशी समितीने ठेवला होता; परंतु गेल्या चार वर्षांत मात्र सातत्याने कारवाई रखडत असल्याची माहिती समोर आली आहे.