मध्यरात्री शहादाकडून धडगावकडे अवैध दारूने भरलेला ट्रक येत असल्याची गुप्त माहिती धडगावचे पोलीस निरीक्षक गोकुळ औताडे यांना मिळाली. औताडे यांच्या मार्गदर्शनाखाली धडगाव पोलिसांनी चोंदवाडे (ता. धडगाव) फाट्यावर पहाटे पावणेचार वाजता सापळा रचून ट्रक (क्रमांक जीजे १६ डब्ल्यू ८५५४) अडविला. दरम्यान, ट्रक चालकाला विचारपूस केली असता त्याने उडवाउडवीची उत्तरे दिली. परंतु ट्रकची तपासणी केली असता त्यात विना परवाना वाहतूक होणारी सुपर व्हिस्की या दारुचे १०० बॉक्स आढळून आले. या बॉक्समध्ये प्रत्येकी १२ बाटल्या अशा एकूण १२० बाटल्या ताब्यात घेण्यात आल्या असून त्याची नऊ लाख एवढी किंमत असल्याचे पोलिसांकडून सांगण्यात आले. याशिवाय १३ लाखांचा ट्रक असा एकूण २२ लाखांचा मुद्देमाल जप्त करण्यात आला आहे.
याप्रकरणी पोलीस कर्मचारी राजेंद्र चोरले यांच्या फिर्यादीवरून ट्रक चालक मालसिंग उतऱ्या पाडवी रा. जुनीकरी पाडा (काकडदा) ता. धडगाव व मंगल हिम्मतसिंग पावरा रा. उमराणी बुद्रूक, ता. धडगाव या दोन जणांविरुद्ध धडगाव पोलिसांत गुन्हा दाखल करण्यात आला आहे. त्यापैकी मालसिंग उतऱ्या पाडवी यास पोलिसांनी ताब्यात घेतले आहे, तर दुसरा आरोपी फरार आहे. ही कारवाई पोलीस निरीक्षक गोकुळ औताडे यांच्या मार्गदर्शनानुसार संजय मनोरे, राजेंद्र जाधव, विनोद पाटील, महेश कोळी, गणेश मराठे, हिरालाल सोनवणे व अभिमन्यू गावीत यांच्या पथकाने केली. तपास पोलीस उपनिरीक्षक राहुल भदाणे हे करीत आहेत.