शहादा : कोरोनाबाधित रुग्ण जास्त संख्येने आढळणाऱ्या गावाला आरोग्य पथकामार्फत घरोघरी नागरिकांची आरोग्य तपासणी करण्यात यावी. बाधितांच्या संपर्कात असलेल्यांना विलगीकरण कक्षात ठेवण्यात यावे. त्याचप्रमाणे तपासण्यांची संख्या वाढवावी, अशा सूचना केंद्रीय आरोग्य पथकाने केल्या असल्याची माहिती इन्सिडेंट कमांडर कथा प्रांताधिकारी डॉ. चेतन गिरासे यांनी दिली.
तालुक्यातील फत्तेपूर येथे केंद्रीय पथकाचे प्रतिनिधी तथा संसर्गजन्य आजार नियंत्रण विभागाचे सहसंचालक डॉ. संकेत कुलकर्णी यांनी भेट देऊन पाहणी केली. फत्तेपूर गावात गेल्या काही दिवसांत मोठ्या संख्येने बाधित रुग्ण आढळून येत असल्याने या पार्श्‍वभूमीवर त्यांनी आरोग्य विभागाच्या कर्मचाऱ्यांशी संवाद साधत प्रत्यक्ष घटनास्थळी भेट देत आजपर्यंत केलेल्या उपाययोजनांची माहिती घेत यापुढे काय करावे, याच्या सूचना केल्या.
पॉझिटिव्ह रिझल्ट आला, मात्र कुठलीही लक्षणे नसणाऱ्या रुग्णांवर विलगीकरणगृहात आयसोलेटेड केले जाईल. प्रथम टप्प्यात ५० ऑक्सिजन बेड कार्यान्वित करण्यात येणार आहे. त्यानंतर दुसऱ्या टप्प्यात ५० असे १०० ऑक्सिजन बेड कार्यान्वित केले जातील. खाजगी रुग्णालयांकडे ११५ ऑक्सिजन बेडची संख्या आहे. मोहिदा शिवारात ऑक्सिजन प्लांटचे काम सुरू असून कोइम्बतूर येथून मशिनरी मागविण्यात आली आहे. तो लवकरच कार्यान्वित केला जाणार आहे. विलीनीकरणाला प्राधान्य देण्यात येणार असून शासकीय कोविड केअर सेंटरमध्ये खाजगी डॉक्टरांची उपचारासाठी मदत घेतली जाणार आहे. तालुक्यात चाचण्यांची संख्या वाढविण्यावर भर देण्यात येणार आहे.
यावेळी तहसीलदार डॉ. मिलिंद कुलकर्णी, मुख्याधिकारी राहुल वाघ, जि.प.चे माजी कृषी सभापती अभिजित पाटील उपस्थित होते.