बोरद गाव २२ एप्रिलपर्यंत प्रतिबंधित क्षेत्र घोषित

तळोदा तालुक्यातील कोरोनाचा हॉटस्पॉट ठरलेल्या बोरद येथे दिवसेंदिवस रुग्णांच्या संख्येत वाढ होत होती. या पार्श्वभूमीवर गावातील कोरोनाचा प्रादुर्भाव वाढू नये यासाठी शासनामार्फत कठोर पावले उचलण्यात येत आहेत. तळोदा उपविभागीय दंडाधिकारी तथा घटना व्यवस्थापक शाहूराज मोरे यांनी यासंदर्भात आदेश जारी केला आहे. या आदेशान्वये घोषित केलेल्या प्रतिबंधित क्षेत्रातील वैद्यकीय व अत्यावश्यक सेवा वगळता इतर सर्व आस्थापना ८ एप्रिल रोजी सायंकाळी सहा वाजेपासून ते २२ एप्रिल रोजी सायंकाळी सहा वाजेपर्यंत बंद ठेवण्यात येतील. प्रतिबंधित क्षेत्रात प्रवेश करणाऱ्या प्रत्येक व्यक्तीची तापमानाची नोंद घेऊन, विशेष पथकाद्वारे घरोघरी सर्वेक्षण करून आदेशाचे दिवसापासून शक्यतोवर तीन दिवसांत सर्व संशयित रुग्णांचा शोध घेण्यात यावा. शासनाच्या मार्गदर्शक सूचनांनुसार संशयितांची तपासणी नमुने घेण्यात यावेत. प्रतिबंधित क्षेत्रात सर्वेक्षण वैद्यकीय सुविधा पुरविण्याची जबाबदारी वैद्यकीय अधिकारी यांची राहील. प्रतिबंधित क्षेत्रात उक्त कालावधीत जमावबंदी लागू करण्यात येत असून सर्व प्रकारच्या धार्मिक, सामाजिक किंवा इतर सर्व सामुदायिक कार्यक्रमास प्रतिबंधित राहील. सनियंत्रण अधिकारी यांनी जीवनावश्यक वस्तूंची घरपोच सेवा उपलब्ध करून देण्याकरिता सशुल्क सेवा सुविधा उपलब्ध करून द्याव्यात. प्रतिबंधित क्षेत्राकरिता पोलीस निरीक्षक तळोदा पोलीस ठाणे यांनी योग्य तो बंदोबस्त लावावा. आदेशाची अंमलबजावणी करण्याकरिता सनियंत्रण अधिकारी म्हणून तळोदा पंचायत समितीचे सहायक गटविकास अधिकारी सोनवणे यांची नियुक्ती केली आहे तर तालुका वैद्यकीय अधिकारी डॉ. महेंद्र चव्हाण यांची वैद्यकीय अधिकारी म्हणून तर सहायक सनियंत्रण अधिकारी म्हणून बोरद ग्रामपंचायतीचे ग्रामविकास अधिकारी विजय पाटील यांची नियुक्ती करण्यात आली आहे.