नंदुरबार तालुक्यातील ४१ तर शहादा तालुक्यातील ३५ अशा ७६ ग्रामपंचायतींची सोडत यापूर्वी काढण्यात आली होती. यात नंदुरबार तालुक्यातील न्याहली ही ग्रामपंचायत एस.टी.प्रवर्गासाठी तर जूनमोहिदा ही एस.सी.प्रवर्गासाठी राहणार आहे. तर शहादा तालुक्यातील पुसनद ही एस.टी. तर टेंभे ता.शहादा व कुढावद तर्फे सारंगखेडा या ग्रामपंचायती एस.सी. प्रवर्गासाठी राखीव राहतील. २०२० ते २०२५ या दरम्यानच्या कालावधीतील हे आरक्षण राहणार आहे. दरम्यान ८६ ग्रामपंचायतींच्या सरपंच निवडीचा कार्यक्रम लवकरच होणार असल्याने त्यासाठी धावपळ सुरू झाली आहे.
नंदुरबार तालुक्यातील २०, शहादा तालुक्यातील २७, धडगाव १६, नवापूर १४, तळोदा सात तर अक्कलकुवा तालुक्यातील १ अशा ८७ ग्रामपंचायतींचा निवडणूक कार्यक्रम गेल्या वर्षी डिसेंबरमध्ये लागू झाला होता. यांतर्गत १५ जानेवारी रोजी मतदान झाले होते. या सर्व ग्रामपंचायतींचे सरपंच आरक्षण जाहीर झाले आहे. यातून त्या ग्रामपंचायतीत त्या संवर्गाचा उमेदवार निवडून आला आहे किंवा कसे यानुसार सरपंच निवडीची प्रक्रिया होणार आहे. धडगाव, अक्कलकुवा, तळोदा व नवापूर हे चार तालुके १०० टक्के पेसा क्षेत्रात असल्याने त्याठिकाणी अनुसूचित जमाती संवर्गातील पुरुष किंवा महिला हे आरक्षणानुसार सरपंच होतील. नंदुरबार आणि शहादा तालुक्यात मात्र काही अंशी सरपंचपदाच्या आरक्षणानुसार उमेदवार शोधण्याकडे लक्ष लागून राहिल.
पुढील प्रक्रिया सुरु
गुरुवारी ३१९ पेसांतर्गत ग्रामपंचायतींचे आरक्षण काढले गेल्यानंतर नुकत्याच निवडणुका झालेल्या ग्रामपंचायतींच्या आरक्षणानुसार सरपंच निवडीची प्रक्रिया सुरू होणार आहे. यानुसार प्रथम सभा होऊन सरपंचपदाची निवडणूक प्रक्रिया घेण्यात येणार असल्याची माहिती आहे.
बहुमताकडे लक्ष
नंदुरबार आणि शहादा तालुक्यातील काही गावांमध्ये अनुसूचित जाती, जमाती व नागरिकांचा मागास प्रवर्ग यातून निवडून आलेल्यांना सरपंच होण्याची संधी मिळणार आहे. या गावांमध्ये एक किंवा दोनच जागा या संवर्गासाठी होत्या. यातून या उमेदवारांना सरपंच पदाची लाॅटरी लागणार आहे.