जिल्ह्यात परराज्यातून येणाऱ्या वाळू वाहतूकदारांवर महाराष्ट्र शासनाच्या यासंदर्भातील परिपत्रक अटी व शर्तीचे पालन करून परराज्यातून वाळू व रेतीची वाहतूक करण्याचे निर्देश जिल्हाधिकारी डॉ. राजेंद्र भारुड यांनी दिले आहेत. त्यानुसार परराज्यातून वाळू व रेतीची वाहतूक करणाऱ्या व्यक्ती अथवा संस्थांना गौण खनिजाचा उत्खनन व वाहतूकसाठीच्या संगणकीय प्रणालीमध्ये नोंद करणे बंधनकारक करण्यात आले आहे. परराज्यातून अवैध मार्गाने येणाऱ्या वाळूची अनुज्ञापी क्षेत्रीय कार्यालयाने तपासून परराज्यातून आलेली वाळू वैध परवान्याद्वारे आल्याची खात्री प्रशासनाकडून करण्यात येत आहे. त्यासाठी पथकांचीही नियुक्ती करण्यात आली आहे. असे असताना एम.एच.१८ एम- ९३९१ या क्रमांकाचे वाहन गुजरात राज्यातून १० टन रेती वाहतूक करताना तळोदा तालुक्यातील आमलाड येथे तळोद्यातील पथकाला आढळून आले. शासन परिपत्रकानुसार महाराष्ट्र राज्याचा झिरो रॉयल्टी पास त्यांच्याकडे नसल्याने या वाहनावर कारवाई करण्यात आली व ते वाहन जमा करण्यात आले असल्याची माहिती तळोद्याचे तहसीलदार गिरीश वखारे यांनी दिली. परराज्यातून आलेल्या वाळूचा साठा वैध परवान्यापेक्षा जास्त आढळल्यास किंवा झिरो रॉयल्टीशिवाय वाहतूक केलेली आढळल्यास महाराष्ट्र जमीन महसूल संहिता दंडात्मक कारवाईला पात्र राहील, असे जिल्हाधिकारी डॉ. राजेंद्र भारुड यांच्याकडून प्राप्त झालेल्या आदेशानुसार ही कारवाई करण्यात आल्याचे सांगितले जाते.
दरम्यान, तळोदा हा तालुका गुजरात राज्याच्या सीमेवर आहे. शेजारील हातोडा, सदगव्हाण, उभद आदी ठिकाणी गुजरात राज्यातील वाळूचे ठिय्ये कार्यरत आहेत. या ठिकाणावर मोठ्या प्रमाणात महाराष्ट्रातील ग्रामीण भागात तसेच सातपुड्यातील दुर्गम भागात वाळूची वाहतूक करण्यात येते. या भागात होणारी वाळूची अवैध व चोरटी वाहतूक रोखण्यासाठी तळोदा महसूल प्रशासन जिल्हाधिकाऱ्यांनी दिलेल्या आदेशानुसार कारवाई करणार आहे. तळोदा महसूल प्रशासनाने जिल्हाधिकाऱ्यांनी दिलेल्या आदेशाची अंमलबजावणी करण्यासाठी तीन पथकांची नियुक्ती केली आहे. त्याचप्रमाणे चेकपोस्टही उभारलेले आहेत. हे पथक चेकपोस्टवर कार्यरत राहणार आहे. शिवाय फिरते पथकही कार्यरत राहणार असून मोठ्या प्रमाणात वाळूच्या वाहतुकीवर मॉनिटरिंग करण्याचे नियोजन तळोदा महसूल प्रशासनाकडून करण्यात आले आहे.